[ عراقيّات ]

[شذرة السيف]

مذكرات عاشقه
قال لها في محطة الوداع :
لا تخافي سوف أأتي كي تكونين الأميره

سنتين اتفقنا وقضن عشرين
ورمح هجركـ لهسه بروحي مغروس

وعشت كل عمري ليل بغير مـ القاكـ
أباوع ع الشمس تمثال فانوس

جائز يم عشيقه هناكـ ظليت
وما ألومكـ ضحكـ والليل والكوس

وهواي القلوب وواحد الحب
يظل التاج بس تتبدل الروس

وتظل مطلوب إليّ ولا تنكر الدين
ترى بدم الشجر متلطخ الفوس

ضعت بعدكـ حبيبي بلايا عنوان
ومثل الريح أمشي بلايا سكان

الشماته استفحلت وأتوسلكـ عود
إذا تموت الشمس تفرح العميان

و مهرتكـ باقيه ومارضت خيال
لأن حاشى لغيركـ تنطي العنان

وظل قلبي بأمل ترجع وألاقيكـ
و قلت خله بأمل ما أحجي خله

محضرتلكـ لحن ماسامعه العود
لحن الريح تعزف على القذله

طلع كل الـ رسمته أوهام بأوهام
أرسم ع الظلام بقلم كحله

ترس راسي الثلج وأتأمل تعود
بعد ماظل وقت وأعطيكـ مهله

بدلة عرسي أمس خلصت تفصال
من شيب الزلف فصلت بدله

وبعد ذاكـ انتظار وحب السنين
ماأريدكـ تجي لأحلامي فارس

وصلني الموت عاد احضر التشييع
ترى بدونكـ يظل يكسر الواهس

وأظن حقي السفينه تموت بالماي
وهم تمشي بجنازتها النوارس

 

[شذرة السيف]

ظلمه مهجوره المحطه
و ما آشوفكـ وإنت يمي
شلون من تروح ..!
أظنكـ تآخذ وياكـ الشمس
لا تقلي بلايا ماتعبر حدود
إنت غريب
إنت ع الفقرا تشق زيج الدموع
وتحبل عيونكـ نثايا
وفوق وجناتكـ تجيب


و إنت من تسمع شطر بيه صوره حلوه
تصير دمعه
و على شفافكـ يكسر التاريخ ضلعه



شلون بالغربه الشعر شيسوي بيكـ ..!
و إنت شاعر
يعني إذا ما تكتب تطر باب قلبكـ
والشعر يزعل عليكـ ,
و توقف بعينكـ جروحكـ
و المصيبه شلون من تكتب قصيده وحلوه تطلع !
جنها بنتكـ
وماردتها تظل غريبه
و شققتها
وانت كاتبها على روحكـ
لازم تشق حتى روحكـ ..



شلون والآوادم غريبه
وصفنة عيونكـ غريبه
وإنت ماشي بلا متاع
إنت ماتدري متاع الغربه لازم
عين وقحه
و حيل ذيب !
وإنت تبكي على العصافير الـ تدق شباكـ بيتكـ
شلون لو كفكـ يدق باب الحدود !




وكل شي بالغربه حجر
حتى الدمع ينزل على خدودكـ حجر
شوف الدموع تغيّرت
بالغربه واهسها انكسر


الليل رد باب الشمس
وانكسر شباكـ الصبح
والشارع يطفي الضوا
ويشتعل فانوس الجرح
وتفوت بالشارع
غريب
الدنيا والبيبان تتلفت عليكـ
وماكو باب يرد وحشتكـ
و ماكو باب الـ يحمل النار الـ بيديكـ

 

[عبدالناصر الأسلمي]

يصح خصلة شعر تفرش دواوين
ويصح ديوان ما يسوى حصيرة
ويصح كومة زلم ما تسوى فلسين
ويصح مثلك اخو يسوى عشيرة

 

[شذرة السيف]

عليكم جذب الـ قال آنا مرتاح
يا راحه الـ بلياكم تجيني ..!

العطش من باق لون شفافي وراح
متت لكن روّني دموع عيني

شلون آرتاح وإنتم هم بعيدين .!
ونار فراقكم تآكل بـ السنين

آتمنى الشمس بـ الايد تنلاح
و تآخذني عليكم توديني

 

[شذرة السيف]

هم تحتاجني وترجع إليّه

شـ ما يعلى الشجر
ماينسى فيّه

ماضيكـ آنا أعرفه وكل ظروفكـ
وكنت تشكي لي كل ماردت أشوفكـ
صحيح توّفقت / بس مو عليّه

هم تحتاجني وترجع إليّه

ما ناسيني بس ناسي إنت نفسكـ
و أعرفكـ زين ما يحتاج أدرسكـ
ما أهتم لكـ شـ ماتجي ضدي
آخاف تحس لكـ فد قيمه عندي
و أظل شـ ماصرت روحي أبيّه

هم تحتاجني وترجع إليّه

 

[شذرة السيف]

 

[شذرة السيف]

بيني وبين نفسي شقد أفكر بيكـ
وأقول شمعنى أنت الـ شاغل ظنوني .!
مو أول محب خاطر تسل الحال
ولا أول جمال تشوفكـ عيوني
شجاها الروح يمكـ ذبت الأسرار .!
وليش أرجف عليكـ وينخطف لوني





وحتى الناس قامت تعرف بهالحال
ومااعرف شقلهم من يسألوني
يطبون بصفنتي وعنكـ يدورون
و يلقوني أفكر بيكـ يلقوني
و صاحت كلها صاحت :
هذا هذا فلان
و ماعندي لقوكـ و بيكـ تهموني
تهموني بمحبتكـ والله لويدرون
على ضيم الـ عليا يظل يواسوني





مايدرون عايفني بمهب الريح
وأنا وياكـ عفت الـ مايعافوني




الـ يحبوني شكثر ولـ جيّتي يتانون
و أخجل من كثر ما قاموا يتنوني
وإنت الـ ماتحبني شلون بالله وياكـ ؟
أمرن بيكـ / ما أمر بـ الـ يحبوني ؟



عفت اللي شروني ومن أرد شلون .!
هم أسوى بعد والنوب يشروني ؟



حبيتكـ شـ جاني و ماحسبت حساب
خي عونكـ عليّ مو آنا خي عوني
ما تحبني وأحبكـ والمصيبه النوب
أريدكـ و أنهزم من الـ يريدوني




ومن دونكـ صرت ما أعيش ويا الناس
و إنت بكل سعاده تعيش من دوني
بـ أحزانكـ أودي عيوني تبجي وياكـ
وبـ أفراحكـ أبد ما تذكر سنوني



من سمعوا أهلنا العشق دق الباب
ما خلوكـ أهلكـ / و أهلي خلوني
ما خلوكـ أهلكـ حقهم يخافون
بس أهلي لـ محبكـ شلع باعوني

 

[شذرة السيف]

بعدكـ بالقلب رغم الخلافات
المسافات انلغت بينك وبيني


ما ينطيني قلبي أزعل وياكـ
بس إن شاء الله قلبي ينطيني


أتوقع يجي فد يوم أنساكـ
بس أتمنى أموت وما يجيني


أعرفكـ مو إلي بس أنا أهواكـ
لأن إنت الوحيد الـ مالي عيني











اكو شاعر يضحكـ ويكتب لقيته
و اكو شاعر يبجي ويكتب لقيته



واكو شاعر على نيته
بس كبر صيته / و كبر صيته / و كبر صيته
وبنى بيته بلايا ساس
و صفقوا له وطاح بيته



بينما شاعر قوي و ماأخذ فرصه
يكتب وما أخذ فرصه
بس قوي شيطان شعره من كثر ما بيه جنون
صار لكـ بالشعر قصه
حتى لو ما يجي يقرا
تروح له لبيته المنصه



كل شي اكو بس مدوا ايديكم
ترس ايديكم
كل شي ما كوا