مُعْتَكَفْ ..

[نوف الناصر]

•

أنا فوضى .. تناقض فِيْ
‏كثير امارس التطنيش

‏أدوّر شِعر بين الغي
‏و أروقة السهر والطيش

‏أنا أصلاً بقايا حي
‏أحاول أكتبه واعيش

‏

‏18 يونيو

 

[نوف الناصر]

•

تْمرّد الما ..والعطش يبّس عروق
يا سيّدي والله هذا الظما .. ذل

شفني وانا دايم أناديك من فوق
أتْعبت حنجرة الوفا .. بالتخاذل

•
•

24 فبراير

 

[نوف الناصر]

•

مافقدت من العتيم إلا نهاري
يوم كف الليل بالعتمة تحنّى

بين بردي والسلام اوجست ناري
والأمان اللي لقيته ضاع منّا

طاح غصن ..ومات ورد ..وغاب طاري
بين أغصان الشعور اللي تثنّى

طالت الرحلة ومليت انتظاري
أنتظر مناّ .. و منّا أوّ منّا

تاهت الخطوات في درب انكساري
ضاعت الوجهات والغربة وطنّا

ما قطفت من الحياة الا مراري
ماخذلني فـ الزمان الا زمنّا

http://www.ab33ad.com/vb/showpost.ph...6&postcount=13

 

[نوف الناصر]

•

ممكن امحي كل شي ؟!
ممكن ابعد
ممكن ارحل
ممكن اتنفس شوي ؟!!

18 مايو

 

[نوف الناصر]

•

‏•
‏

يطل العيد ..
‏ويِمْلاني حزن … تَنْهيد..
‏يمُر العيد ..
‏كذا عادي !! ولايفرق !!
‏مُمل وبارد وْمُظلم مثل روحي..
‏متى يشرق ؟!
‏متى أشعُر .. بأن الصّبح يَحْمِل بهجة اطفال بْعَياديهم ؟!
‏ويِزهى في سوالفْ .. وابْتسامات أمَّهات.. مْحَنّياتْ كْفوف اياديهم!
‏وانا وحْدي..
‏أدوّر في كِفوفي عن بقايا لمسةْ كْفوفه..
‏وفستاني مِعَلَّقْ ما لِبَسْتَه بعد..!
‏وحتى الورد..
‏ذِبل يوم ارتحل عني وراح بعيد!
‏أخاف يْطوِّل غْيابه..
‏ولا شوفه..
‏ويروح العيد..!!

‏•

‏ ‏27 يونيو 2023
‏من الأرشيف



https://x.com/too_simple_girl/status...092600367?s=46

 

[نوف الناصر]

•



‏

وانا اتخيّل أروح لـ ( وين ؟!)
‏يحاصرني الشتا وابحث فـِ قلبك
‏عن ركن دافي…
‏واغنيلك مطر تشرين
‏تغنيلي سحابة صيف
‏بـ ضْفافي ..
‏وامر بـ ( لين )
وأترك بعضي خْلافي..
‏واسولف لين يتعبني الكلام
‏اللي تركته في طرف قافي..
‏واحاول أكتبك بيتين
‏واقول ان الشعر ضافي..
‏ويتعبني سؤالك :
" مين ‏رسمتي في ملامح وجهك الغافي ؟!!"
‏واغيب وأتركك ما بين ..
‏ جواب الشك و التخمين !
‏و انام و دمعي لحافي..

‏

ارتجالية
سبتمبر 2023

https://x.com/too_simple_girl/status...613241725?s=46




•

 

[نوف الناصر]

•






‏•

‏

خبّ روحك عن عيون العابرين وغادر
‏سكّر الباب الموارب عن حزين شْعورك

‏وان لمحت جْروح قلبك في يديهم .. بادر
‏بالغياب اللي رميته في شليل حضورك

‏طيّر اسراب المواجع والشعور الهادر
‏قبلِ كفّ الريح تكسر غصنك وعصفورك !

‏وانثر اوراق المشاعر والحنين السادر
‏في مدن روحك وشيّد من جروحك سورك

‏وان شعرت انك على النسيان منت بْقادر !
‏إفتح الباب الموارب و يْتهادى نورك

‏•
‏
‏#وليدة_اللحظة
‏30 مايو2024

https://x.com/too_simple_girl/status...699473858?s=46

 

[نوف الناصر]

•

[ مشـهـد ]

‏مثل طفلة تخبن اطراف المسافة بين عشب وبين ديمة
‏اخبن ثياب الحنين وْ أرتمي بين السواقي والسنابل

‏أنده عيونك.. وصوتك .. وان لمحتك آتخبى وسط غيمة
‏وارتدي معطف مطر وانبت زهر وارقص على صوت البلابل

أنتظر كـل الرسايل والاغاني و المواعيد القديمة
‏لو نجدّدها على ضفة نهر يشبه عيونك ونتقابل

‏في يدك "بوكيه ما" يشبه عيوني ، يشبه لطعم الهزيمة
‏يـوم يفلـت مـن يـديني فـ النهـر فـي ضفّتينـه ورد ذابل

والتفت انده عليك وتختفي بين الخيالات اللئيمة
‏كان حلم اللي رويت بذاكـرة طفلـة زواياها ذوابل

‏




#خرابيش