ارتداد

[ماجد العيد]

أدري ندمتي ..
أدري كثير من الصور ..
اللي رسمتي ..
و أدري عن سكوتك جمر ..
و أدري العمر في لوعتك ..
ما هو عمر ..
كل الثواني واقفة ..
من صدمتك ..
عيّت تمر ..
تبقين في جرحك سنين ..
و بس السنين اللي تمرّ ..
لا تعتبي النظرة مرار..
إغماضتك كانت أمَرّ ..
لو كان كسّرتي الصور ..
تبقى أمَرّ ..
يا معاتبة غيرك بـ ليه ؟!
ذنبك حلمتي ..
.
.
أدري ندمتي ..

 

[ماجد العيد]

مسكين يا واقع ..

يا فلسفة من جهل ..

يا مسخرة شارع ..

 

[ماجد العيد]

كل القديم طاريه ..
كل القديم ..
يا لايذه فيه ..
فقدك يتيم ..
ما له لقى ..
مثلك ..
ما له لقى وصلك ..
لو كان يطريه ..
هذا القديم من الجدار ..
هذا القديم من الفرار ..
و كلّ القديم اللي بقى ..
إلا النهار ..
إلا النهار اللي ..
شمسه رْفِضَتْ تحييه ..
يا لايذه فيه ..

 

[ماجد العيد]

نامي ..
نامي البكاء ..
ما نام ..
نامي ..
نامي الهوى ..
ما دام ..
كل القلوب مسافرة ..
كل القلوب مهاجرة ..
نامي ..
يكفي عيونك ساهرة ..
يكفي .. حرااام ..
نامي ..
نامي مَحَدْ راجع أكيد ..
وش في يدينا للوفاء .؟
دام الوفاء سافر بعيد ..
نامي مَحَدْ راجع أكيد ..
في جانبك كاس الغفا ..
هاتيه .. هاتيه ..
{ في صحة الأحلام }
نامي ..

 

[ماجد العيد]

مشتاقتك ..
مثلي و أنا أكثر بعد ..
هناك لو روحي معك ..
أنا هنا اَشْتَاقَكْ بعد ..
مشتاقتك ..
من موعدي ..
من نبض قلبي و مولدي ..
مثل الزهور اللي بـ يدي ..
مشتاقة تحضن راحتك ..
مشتاقتك .!

 

[ماجد العيد]

لا تسكتين ..
كل المدى فـ صمتك ..
حزين ..
و كل الشموس اللي فـ مداي ..
ممّا جرى فـ صمتك عناي ..
عيّت تبين ..
إنتي ارسمي لـ حرفك طريق ..
يِمْطِرْ سماي ..
يِطْفِيْ حريق ..
يَغْسِلْ فضاي ..
دام الفضاء فـ صمتك حزين ..
لا تسكتين ..
كلي حَكِيْ و إياك ..
كلي قِصَصْ و إياك ..
اللي تبين من القصص ..
اللي تبين .!

 

[ماجد العيد]

شالك البرد ..
أو هو البرد .. شالك ..
حالك الوعد ..
و إلا وعدك لـ حالك ..
مدري الصور حزنك ..
و إلا الأسى مزنك ..
أو هو النظر حالك ..
مدري ..
مدري الشتاء هو مرّ ..
و إلا غفا بـ شالك ..

 

[ماجد العيد]

احتريتي البحْر ؟!
أو هو اللي احتراك ؟!
ما غشاك السِّحْر ؟!
أو سِحْرِك غشاك ؟!
كل موجة قادمة لـ عينك وصال ..
أنفاسها جَزْرْ ..
احتريتي البحر ؟!
أو هو اللي احتراك ؟!

صدّقيني ..
حيل أخاف ..
كل المواعيد الجديدة من فرح ..
كل عاشق ..
كم بكى ذكرى المواعيد الجديدة ..
كل عاشق يصدِق الموعد ..
يخاف ..
.
.
( هو وِصَاِلك بحْر ؟! )