مهمــا كــــان ....

[منار عبدالعزيز]

العتاب علاج .. والشدّة مرض
................ والأصول "عناق".. والا ما نبيه

الهوى ما هو خطر يوم وعرَض
................ الهوى عوقٍ حلو ما له شبيه

::

 

[منار عبدالعزيز]

ما للزمن أصحاب والا حميّه
........ هذا حكم ربي وهذي عطاته

لو ان جمعت سيول عيني هدية
........ يمكن تعرف احساسها من قساته

 

[منار عبدالعزيز]

ضد الألم، ضد انتظار الأماني
................ دام انتظاري ما يعود بنتيجة

بـَرحل وانا اتمنى تعود لمكاني
................ وان جيت، شوقي لك يعاود حجيجه

 

[منار عبدالعزيز]

أزيدك كيف .. والا ازيدك اشواقي؟
............ يا من تباهيت بوجوده على همّي

تعال واهدابي تزيدك شربة الساقي
............ والا فناجيل الهوى بملاها من دمي

 

[منار عبدالعزيز]

ما سابق حروفي سوى مسحة الهم
........ وما عانق ابياتي مثل نغمة الضيق

لكن رضاي بحكم ربي وما تم
........ أكبر من الضيقة وتنشيفة الريق

 

[منار عبدالعزيز]

ودي أخالف مبدأي واقطع العرق
........ وامسي عديمة حس أو حتى إحساس

جايز يصادفني بخت أوله صدق

........ واصير انا حالي مثل باقي الناس!

 

[منار عبدالعزيز]

يا بحر لي وياك والغالي اسرار
................ ياما حيينا وقتها بالليالي

يا رب يرجع راعي القلب والدار
................ واشم نسماتك وانا بحضن غالي

 

[منار عبدالعزيز]

جارت الدمعة وخلاني جفوا
........... والحكي منّه تخيّرت الجميل

قلت ابي قُربٍ ولكن ما سعوا
........... صوبي بخطوة، وحال المستحيل!