•
( الحنـين )
تدري وش يعني الحنين ؟!
الحنين ..
الطعنة اللي بخاصرة جرحي
وفقد الراحلين..!
•
الحنين ..
اللي رسمته..
في تفاصيل الغياب
وكان لوحة معلقة بقلبي الحزين..!
•
الحنين ..
الطفلة
اللي نامت بصدرك..
تدوّر بك
عناق وكلمتين..
•
واليتيم ..
اللي حضن صورة أبوه
ونام يبكي ..
خايف إنه ينقطع حبل الوتين..!
•
واني كل لحظة أموت..
واختنق..
وانا أدور عن بقايا أكسجين.!
من ايدين اللي طعن قلبي غيابه..
وانا واقف عند بابه..
أنتظر حتى أموت من الحزن
اللي فطر قلبي..
و رمى بي..
في دروب المتعبين..!
•
الحنين ..
إني بكيتك..
وانت ماتدري عن اللهفة..
وعن الرجفة..
إذا ناديت اسمي
اللي كتبته..
بين حزن ودمعتين..!
•
واني في لحظة خسرتك..!
وانك أجمل
من حقول الياسمين..
ومن مواعيد الحبايب ..
والأغاني ..
وانك أطهر من
قلوب اطفال ..
وابيض من
نوايا الطيبين ..!
•
انت ماتدري وش اللي خلّفه فيني الحنين ؟؟!!
قلبي المتعب ذِبَحْه البرد تكفا..
مِدِّلي دافي كفوفك ودّي أدفا..
غطّني في (معطف) إحساسك
بحِضْنِكْ..
خلْ صدرك لي وطن ما هو بْمنفى..
ثم سمّعني قديمك من قصايد..
عالقة في الذاكرة واتركني اغفى..
وانت فيها ..
تكفا دورني هناك..
يمكن إني عالقة
ما بين شكك واليقين..!
•
الحنين ..
إني أموت..
المهم إنك تعيش..
الحنين إني احبك..
والله إنه حب صادق ما هو طيش..!
آه لو أتباهى
قدّيش أنا احبك..
كان تِتْماهى
مع روحي وتسألني بلهفة :
( إنتي وين ؟!! )
•
ممكن اسأل :
( إنت وين ؟! )
في دروب المتعبين ؟!
والا في قلبي الحزين ؟!
والا متعلّق على حبل الوتين ؟!
والا عالق بين شكّي واليقين !
•
إرجع لصدري بغنّيلك ( أحبك )*:
يا (حبيبي تدري شِلّي في
غيابك حيل تعّبْني؟!
أحسّك طرت من إيدي كذا
فجأة بِغَمْضِةْ عين)* !
تكفا تعبني الحنين..
والله تعبني الحنين..
*أغنية ( أحبك ) لحسين الجسمي
.
1 سبتمبر 2023
ابعاد
www.ab33ad.com/vb/showthread.php?t=44353
تويتر
https://x.com/too_simple_girl/status...-Zv_esWEdZ8POQ