انت لولا المواجع انت مين ..؟

[محمد بن منصور]

بك عن جميع الناس راهي ومكتفي
ياللي مكانك بين قلبي والشغاف
.
مرّي على روحي بغنَج وتلطفّي
الروح لا حسّت بامانك ما تخاف
.
الروح ينعشها ترى اللطف الخفي
ياغيم متمادي على قتل الجفاف
.
والا بسما عيني تجلّي ورفرفي
مادامت إحساسي بحر وانتي الضفاف
.
انتي من أغراض القصيد العاطفي
من حولك المعنى وأبياتي طواف
.
طفله على باب القصايد تهتفي
والشعر جاوب طفلته بوح وهتاف
.
جيتي وانا ما بين أضوي وانطفي
واشعلتيّ المُعتم من اسنيني العجاف
.
أكبر عجايب وقتنا الخل الوفي
وانتي عجيبه كيف انهيتي الخلاف ؟
.
خذي من الآخر كلامي واعرفي
انتي بداية روح فـ نْهاية مطاف
.
لي موقف وثابت أنا في موقفي
لو للعمر قصّه تخيّرتك غلاف

 

[محمد بن منصور]

في طرف كمّي من الاحلام مايروي الضما
خطوتي في الأرض واحلامي سما
في طرف كمّي حكايات وقصص
نصفها ضحكات والباقي غصص
اعرف اشيا , واجهل اشيا والمهم:
اعرف احيا
والأهم : أني عرفتك
صرت بجناحك أطير
صارت الدنيا بخير
واعرف ان العمر واحد
ما بقى غير القليل
لا تعيشه وانت في دور الضحيه
لا تراخى , لا تميل
دامت الباقي شويه
عيشها بالمستحيل

 

[محمد بن منصور]

الناس من حولك يبيعون الكلام
من يستمع للناس باعوه الفضا
.
سلام عليكم أو عليكم السلام
لو تلزم الثنتين خاواك الرضا

 

[محمد بن منصور]

انت لو تدري عمر
وانت لو تدري حياه
وانت في عرض البحر
كنت لي طوق النجاه
يا حكايه من ضيا
بددت كل الظلام
انت في سكوتك حكي
والمح بعينك كلام
حتى في صمتك شجي
واسمع بهمسك غرام
ما يكفّيني أحبك
ما يكفّيني وربك
انت لو تدري عمر
وانت لو تدري حياه
أجمل ايامي معاك
من يحلّيها سواك
وكل ما طيفك يمر
أدري ان انت العمر
وادري ان انت الحياه
ليت لاحساسي يدين
كل ما شافك يضمك
صرت في صوتك سجين
لا نطقت اسمي بفمك
ما يكفّيني احبك
ما يكفّيني وربك

 

[محمد بن منصور]

يا ذوق كلّك ذوق
المشكلة أكبر
.
مخنوق أنا بالشوق
ولا قدرت اصبر
.
بالله كيف آروق
وصورتك تظهر
.
يا سبّة الطاروق
منك امتلا الدفتر
.
ياقلب يامطفوق
اهدا بعد أكثر
.
بكرة بتطلع فوق
عند القمر تسهر