جلباب الوله !

[ناصر بن حسين]

عتقت الفِكر قبل الصُبح يهدي للمدى غدره !
............... وحيد .. امسيت خلف اسوار سجن الفقد و التحنان ..!

تسللت السهر بـ/ أرجيلي اليِمنى وانا مُكره
............... صحيح الليل موحش بس وش يرضي الزمن لاشان ؟

يامهلكني ترى هالصدر أضيق من ثقب ابره
............... حرام آشق جلباب الوله .. وتشوف خوفي ... بان ..!

بدونك [ فرحتي ] طفله يتيمه حلمها .. اسره
............... تبيع .. الحزن ... أيام الشتا ... كبريت ... بالمجان

تعبت أسقط من إعذوق الرجا كني كِما تمره !
............... تعبت آخشى ( تجاعيد السكيك ) ( الوحده )( البنيان )

تعبت أعكف على سجادتي .. وآتمتم بحسره :
............... ياربي .. ملّ عبدك .. يستلف من أمسه .. النِسيان ..!

بخيل الحظ .. مافكّر .. يجيبك لي عِطر سهره
............... وانا طفلٍ .. شرى للوصلِ .. ساعه .. مامشت للان .!

نِشف غُصن العشق محتاج من ديمومتك قطره
............... مصيبه لو تقول الناس عنّي : مات .. وهو ضميان ..!

كبيره طاولتنا .. والعتب ... كوبين .. منتثره !
............... وأشوف الذكريات .. طيور .. تعلن موسم الهجران ..!

هناك أجلس .. مع وجه الأحد .. تخنقني العبره
............... وما بيني وبينك ... شارع ... أشبه للنكد .. وآذآن ..!

أجوب المنطقه .. شايل .. حكايا أمسي .. لبكره !
............... تدحرجني رياح الشوق ... لعبه ... خانها الصبيان ..!

معاي الصبر .. مفتاحٍ ربطته .. في طرف غتره !
............... عساي ألقى على ... درب الأماني .. للقا ... بيبان ..!

ياهييه الصيف حرّ .. وماترك صدّك سِوى جمره !
............... ومثلي .. يشتعل .. لامرّ سمعه .. طاري .. الخذلان .!

تعال أحتاج لك ... يكفي تسللت السهر ... مُكره !
............... لانه { مايحس .. بحاجة .. الإنسان .. إلا إنسان } ..!



نون!