ساحت على خد الورق دمعة الفقد
تبكـي اللقا لسنين كانت تباشيـر !
ويلاه يا قلب(ن) غدى ممتلي وجد
وش حيلتي لا صار دمعي محادير !
يوم البعد غنى على عوده الصد
اجهم سحاب وطاح منها عصافير !
تساقطت دمعاتها تشتكي البرد
والحزن في عوج الحنايا اعاصير !
ما اورقت دمع السما قاعي الجرد
ولا جاد من همس النداما مسايير !
غنوا على صوت الجفا واخلفوا وعد
واستنكفوا لعتاب عطر ونواوير !
راحو وعيني بلجة دموعها شرد
واقفوا وانا دمعي تساكب طوابير !
يا بنت ردي للغصن نفحة الورد
الشوك يدمي والحنايا مكاسير !
لا تلعبي في خافقي لعبة النرد
تكسب مواجع والاماني مخاسير !
تاخذني الجفوه على محمل الجد
وتجف من جرح التجافي اغادير !
شوفي عيون الحلم من دمعة الفقد
تبكي اللقا لسنين كانت تباشير !
.