البيت أولى من عيال الخنا والبغا

[نايف العنزي]

عدت من جديد


تشوم نفسي عن رفاقة هبالُ ولغا
ما لي بهرجاتهم متعة وصبري قليل

والهرج لا انساق لهروج الخنا والبغا
ماني بهراج في قول الردي والرذيل

البيت أولى من عيال الخنا والبغا
لا صارت هروجهم نقل الردي والرذيل

يا كم ديكٍ يصيح وكم بعيرٍ رغا
ويا كم نسمع سواليفٍ بليّا حصيل

اللي جلس مع معاديني وسمعه وصغا
وش عاد لا صارت البومة لدربه دليل

مالي برجعة رفيقٍ راح من مبتغى
ما دامها دون سبة وش نبي بالثقيل

لا يا قوي العزايم يا حصان الوغى
بالناس نلقى مع الايام *صاحب بديل

وربع المصالح قضى موضوعهم والتغى
اللي يطقّوا على البيبان صبحٍ وليل

يا زهرةٍ زاهية والريح منه فغا
شومي عن اللي بساقه كلّ يومٍ يميل

الصدق مدري عن النيّة ووشو هو بغى
لكنّ في خاطري شيٍّ عريض وطويل

مانيب متكبرٍ هايم ولا بي طغى
لكنّ في غالب الأحيان شعري جزيل