أنا مسافر

[عادل الدوسري]

بسم الله أبدأ
::
::
أبترك الدار لك و اترك لك الديره
والروح ماهيب في يمناك مرهونه

مشكور واللي حصل يا طيب السيره
ترجم جميع الذي كنتوا تخشونه

صبرت صبر ٍ ينشّف ماه من بيره
واسرار متبعثره و اسرار مصيونه

والشوق ملعون في مده و تقصيره
ما يرحم اللي سببه الروح محزونه

والوصل مزن ٍ تحدّر من شخاتيره
يروي عروق ٍ يباس بصادق مزونه

لكن خليتها لك جعلها خيره
و مفارقك صار لي أرباح مضمونه

والعاذل يدق مزماره على زيره
ويجر صوته على فرقاك و لحونه

والشامت يفسرك من ضمن تفسيره
وتصير ضحكة حكي ياللي تعرفونه

منتب كفو للذي خصّك بتقديره
والحب منتب كفو شكله ولا لونه

والعذر خله معك طرحه و تبريره
عذرك على اللي تنشّد ويش مضمونه

ديره بديره و أبدل جيره بجيره
من غير محدٍ يبيّح كل مكنونه

بروح للي ملكنا في تعابيره
الجادل اللي سببه النفس مفتونه

ادعج غنج ما خلق زينه على غيره
مزيونةٍ وان تحاكت ويش مزيونه ؟!!

والعمر فاني ولا شرّه ولا خيره
والحب سنّه مع العربان مسنونه

كل ٍ يحاول و جهده من مذاخيره
واللي مضى في سبيله لا تلومونه

الحاسد يموت بالحسرات والغيره
واهل الوفى حاضره توفي و ممنونه

عادل بوبدر ​الدوسري