بناء على طلب من اخوي وصديقي الشاعر المبدع عون القحطاني اضع هذه القصيدة بين ايديكم راجياً ان تليق بكم وترتقي لذوائقكم
كنت احس بطعنةٍ نجلا من عيونك واداري
.............................. كنت اكذّب رجفة احساسي واقول انك تبيني
ومن تلعثمتي بنطق اسمي ..وعكرتي نهاري
............................... كن ليلي علّق نجومه على عروة سِنيني
قلتي انك ماجرحتيني بقصد وكنت داري
............................. بس وش تنفع دموع العذر وانتي تطعنيني
صدتك اقسى من التلويح في فجر المساري
..................................صدمةٍ ماكنت متوقع تِصير وتهجريني
قلت ابلبس من جميل الصبر دام الجرح عاري
............................... وانتي اللي تلبسين الفرو والدر الثميني
و قمت اكابر وابتسم وآشوم في عز انكساري
........................... وادري انك تعْرفين الصدق من ربكة يديني
ولاطرالي انتقم للجرح وآرد اعتباري
............................. كنت خايف اقطع آخر خيط مابينك وبيني
ومن رحلتي مثل برق الليل في عرض الصحاري
........................... مرت السبع العجاف وطيفك يداعب جبيني
كل ماانْسى هَبّت الذكرى وِجابت لي طواري
.......................... عادت اسراب الحمام وحطت بشرفة حنيني
كيف ابقطع شعْرة الآمال من ياس انتظاري
......................كيف ابمسح دمعة الفصل الأخير بوسط عيني ؟
كيف اقدم للستاير والشبابيك اعتذاري
....................... ويش اقول لشرفة احلامي وشرفة ياسميني ؟
من يصحي وردتين الحب في عتمة جِداري
........................... من يفززلي عصافير الصباح ويحتريني ؟
من يفك زرار ضيقة ليلي وغبشة نهاري
....................... من يرش الما على جمر الجروح ويحتويني ؟
كيف خنتيني وبعتيني وانا اللي كنت شاري؟
.......................... السؤال اللي وقفت سنين عنده صدقيني !!
والعزا اني كل مااضما ماك واتْهِب الذواري
........................... آتيمّم بالصْبَر وآقول ........ ماتستاهليني
آخر المشاركات
07-06-2011, 01:19 PM
ماتستاهليني
العرض الشجري