سحابة شوق .. !

[محمد البدراني]

تدري من تكون ..!
غيمه بالعيون
اجمل واجمل من اللي نكتبه
في هواها سحر واحساس وشجون
وفي جفاها نار جوفي مؤقده

......

دخيل الحال يايمه وانا كني طفل مخنوق

سقاه الهم لين اصبح

يتمتم للفرح ويني .. ؟؟

يصيح ولا لقى غير المواجع للجروح فتوق

تحشرج داخله صوتاً.. !

وطاح دموع بيديني


خذيته بالكفوف اغلى من الدنيا على المخلوق

ما اهين الدمع يا عيني .. !

اضمه واعشبه فيني

ترا روحي مثل ارضٍ والسالفه سحابة شوق

تساقط مزنها وشهو ..؟؟

سوا طهرٍ يصحيني


افتش للفرح فيني لجل طفلاً غدا مشفوق

لقيت الحزن متفصل ..!

على قدي وماليني

الا يا حال كيف انسى ملامح طيفها المشهوق

شهقته وانا ما اشوفه .. !

يا طيب انفاسه تغريني

تمره لا زفرت اللي يداعبها وانا المطفوق

انا وشلي .. ! وليه .. ؟ ازفر

مدام انفاسه تحيني

تطاير بالهوى قدمي تشكل وردةٍ بعروق

نبت من زفرتي ورده ...... !!!

عظيمه يا بساتيني

غفيت وسادتي كوعي صحيت بدمعة ٍ بالموق

سألت الكوع وش فيني .. ؟؟؟

يقول الشوق يبكيني


يغيب ولا درى عني من غيابه غدا بي عوق

ياويل القلب يا ويلاه

ينام وما يمسيني ..

كتبت ولا قريت الا احبه والليالي سوق

تسوقه للغياب اللي

يجفف وردة سنيني

ادوزن بالضلوع اغلى مشاعر ثايره مع شوق

تعالي يا منى روحي

تعالي بس غنيني

غنيني

غنيني

غنيني


............


اسألك بالله .. منهي
ايه منهي ..!
وش تكون ..
اجمل واجمل من اللي نكتبه