شَمعهْ..!

[محمد الغشام]

تذكرت يوم كنت صغير وعمري ستة سنوات ..كنت اقعد من النوم والناس تتسحر
وافطر معهم واغّيب بعض الأكل حق الساعه تسعه ..مو الناس نايمه وانا بالحاره مطاقق مع عيال حارتنا
اذكر يوم من الايام قعدت ولمن نزلت للدور الأرضي فيه دريشه بين الدورين واناظر :eek: إلا اشوف دجاج بالحاره قدام البيت
وتوني ماغسلت وجهي ..رغم وانا صغير مايحتاج اغسل وجهي ..لأن آثار الباميا ماتروح .. حتى لو بكلوركس اغسله

المهم : ماصدقت على الله وانزل تحت وعلى طول على ولد عمتي طلال اتصال ..طبعاً طلال أكبر مني بسنتين ..ودايم يصفقني ..بس احبه ..طبعاً مو جوال لا اتصلت عليه بالبيت ورد علي وقلتله بالحاره فيه دجاج ..وقالي جاي
حارة طلال جنب حارتنا ..بالسيكل يجيبها باربع دقايق وركض حوالي سبع دقايق..

وانا متغيب ورى الباب انتظره عشان نحد الدجاج ونمسكها..لمن وصل طلال واطلع ولبسي جووونان سروال احمر والفانيله زرقاء كني علبة بيبسي القديمه ذيك
وركض وراهن ووراهن ووراهن وفزع معنا عبود الله يذكره بالخير جاري اكبر مني بسنه كذا..
حنا نركض ونحدهن وعبود يمسكهن ..طبعاً حسيت ان طلال يخاف من الدجاج بس جاي فزعه ومسوي قوي عندي
وانا طبعاً أقوى واحد بالحاره .. :rolleyes:
ولمن مسكناهن خذيتهم وحطيتهم ورى البيت عندنا ومسوي لهم صندقه او بيت
اذكرهن دجاجتين وديك ..
يوم غيبناهم عندنا في بيتنا ..وجبت لهم في صحن ماء والصحن الثاني رز
واذكر جاني فهيد اخوي اللي اكبر مني بسنه وثلاث شهور ..ويقولي منين جبتهم قلت له شريتهم من واحد بالحاره الثانيه
وقلت له لاتعلم ابوي ..قال خلاص ..
وبعد مافطرو المغرب انا هنا انام قدام التلفزيون كالعاده ويجيني كف واروح انام بالغرفه .
ولمن صحيت الفجر اسمع الديك كوكو كوكو <<< ترجمه
هنا ابوي راح يقص اثر صوت الديك ولمن شافهم ...يعني بوكس مع بوسه مع نجوم الفجر ..ولا مانع من الشلوطي :confused:
الشلوطي اعتقد تسمونها فنقر ..أو ركله من الخلف ..
وبعد يوم درى جيراننا عن الديك والدجاجتين وهي هربانات من عندهم شكل شبكهم مشقوق
وخذو دجاجهم وديكهم الوهقه ..
وجاني فهيد وكملها بوكس وكف من شان أني كذبت ..وقلت شريتهم والرجال متحمس يبي يسوي لهم بيت احلى ..

نكمل بعدين ..