مدهال النوايا..

[نبض الحنايا]

( بسم الله الرحمن الرحيم )
السلام عليكم ورحمة الله وبركاته .
مصافحه أولى لقلوبكم أرجو أن ترتقي لذائقتكم العذبه ..
* مدهال النوايا *
وين أشوفك وألتقي وياك ياعذب السجايا
وأهتني في دنيتي وأنسى عذابي في غيابك
وأقهر العذال واللي بيتلذذ في شقايا
لااشبكت إيدك يدي وقلت ياالغالي هلابك
وأنثر الورد وشموع الحب توقدها معايا
وماألوم الكون كله لو بدى غير وزهى بك
علّ هذا اليوم أقرب من حروفي للشفايا
وأقرب أقرب من لظى الحزن الموطّى في عتابك
وأنت أقرب من غزاني وإحتوى ذيك الحنايا
وأقرب من اللي احسه لاطروا حضرة جنابك
كنّ مافالكون غيرك يابعد كل البرايا
وأنت وحدك من تربع في خفوقي وإعتنى بك
تدري وش أغلى بحياتي من ملايين الهدايا؟
نظرتك وأبيات شعرٍ تحتفظ به في كتابك
ومادريت إن الحواس الخمس بأسبابك ضحايا
وتدري إن القلب بيتي لكن إن الباب بابك
وتدري إنك للمكارم عدّ وللمده عطايا
وتدري إني مابغيت إلا حضورك عن غيابك
وتدري إنك للنوايا البيض مدهال النوايا
وتدري إني نيةٍ بيضا يذرّيها شبابك
وتدري إن الصمت يسكن دايم بعين الزوايا
فإن سكت إعرف بأني من رحابي في رحابك
وإن حكيت إعرف باني يمّك أسوق المطايا
والمطايا كلّها لك يافدى منهو حكى بك ..

تقديري للجميع ..

أختكم / نبض الحنايا