الحلقه14 محمد الضويحي وغنج نجد ..في بلا موعد

[غنج نجد]

الف شكر محمد عالأغنيـــه جداً رائعه وذوقك راقي




سلاااااااام



والله اني عارفه تـأخرت اليوم بس تعرف يا محمد يوم الجمعه الله يشرفه احسه كئيب جداً
وسريــع جداً .. من تصحى من النوم وانت مشغول وعصريته تطير بسرعه وابو الشباب
( هتلر ) موجود يعني نظام عسكري في البيت وتفتيش وحالتنا حاله ..

تقول بكيت اكثر من ست مرات اليـــوم ... ؟



عاد ابشرك اليــوم ما بكيت للحين .. بس خنقتني العبره مره وحده قرأت خبر الطفل المخطوف بمدينة الجوف الله يدفع البلا
وتخيلت ام ( البيبي ) ويــــــل قلبي عليها ..

محمد علومك بالسفر جميـــله جداً .. كنت اتمنى اتعمق اكثر في خوالج محمد اثناء السفر لأنني على يقين
بـأن لديك من المواقف الشيئ الكثير والكثير ..

<<< تحب السفر كثير ولها بلاوي بالسفر بس راح تعقل وما تفضح بعمرها ..

راح ارجع لأسئلتك مع انك بتوديني ( جوانتانامو )

على طاري البكاء / ايهما اكثر ابتهاجا للنفس الضحك ام البكاء .....؟

اعتقد يا محمد البكاء .. ارتاح كثير عندما ابكي .. احس الدموع اطهر ماء الأرض .. عندما
تنساب على وجنتي صدقني احسها تغسل حتى ذنوبي لذلك ابكي ..
لا اتحمل ارى موقف يؤثر بنفسيتي دون ان ابكي .. حتى مساعد ولدي عندما يبكي لأتفه سبب
اشاركه بالبكاء وكـأنني طفله ..
الضحك يا محمد يميت القلب لا احب الضحك ( بقهقهه ) مع ان الأبتسامه تكاد لا تفارقني
ولكن ان اضحك بشكل هستيري او بصوت عالي لا احب ذلك ...

ويــــل قلبي على ذالواجب ......
بجد يبكي ..



سؤالك عن رأييي في كل من /

صدام حسين / الله يرحمه هذا حقه علينا كمسلم .. بصراحه بكيت بحرقه عندما قتل على طريقة قتله
وبصباح العيــــد احسها صفعه على وجه كل عربي .. برغم الجرح الذي تسبب به لنا في اجتياحه لدولة
الكويت .. ولكن ياليت العراق على صدامها ولا اللي يحصل ونشوفه فيها الآن ...

اسامه بن لادن / لا احبــــه .. احس الرجـل منافـــق خرب افكار شبابنا بلمسة الحزن المعتليــه جبينه ..
وغير نظرة العالم للدين الأسلامي .. اصبحوا هناك في اوروبا يحتقرون حتى المحجبــه .. ويخافون من
المسلمين .. تغيرت النظره لنا بسببه ... وانجرف الكثير من الشباب وحتى الشابات مع فكره المتطرف ..

عبدالباري عطوان / قصدك ( عبدالباري دولار مو ....؟ ) اللي اعرفه عن هذا الرجل بـأنه رئيس تحرير
جريدة القدس العربي والتي تصدر يوميا في العاصمه البريطانيه لندن .. الرجل منافق اكرهه ..

الحكم السعودي خليل جلال / انا لا اشجع النصر اطمـأن دمي هلالي زمان بس الحين فقط اشجع المنتخب
والله يعظم اجركم بالهزيمه امس يالنصراويين <<< بتنجلد ذالبنت

عبدالله الفوزان / يكفي انه ابن ديرتي حايل .. الرجل تعجبني ثقافته ومقنع كثير بـأسلوبه وهو عضو هيئة التدريس
بجامعة الملك سعود .. قسم علم اجتماع .. قليل اتابع برامجه ولكن اعرفه جيداً

الدكتور طارق الحبيب / جميل جداً ويكفي احترمه لأنه زوج زميله عزيزه جداً على قلبي الله يذكرها بالخير
من خلال معاملته لأهل بيته الرجل رجـــــل حنون جداً وحسب معلوماتي الآن يقوم بتفسير القرآن الكريم
تفسير نفسي وهذا يعتبر اول طبيب يفسر القرآن تفسير نفسي وننتظر كتابه بشغف ابو علي ...

كتابات نافع التيمان /

نافع التيمان ...... يــااااا ه احس هذا الرجل نادر .. هو لا يحب ان يمدح ولكن انـا لا اريــد سرد خصائل نافع الجميله
لأنني اعرفه عصبي كثير ويحمل قلب طفل بصدره .. <<< بيجلدها ..
نافع للأسف الشديد بخيـــــل على قرٌاءه .. فلسفته جميـــله جداً .. تقرأها لأول مره وتخرج من متصفحه مذهول لا تفهم شيئ
وترجع للقراءه مره اخرى فتجد بـأنك غبي .. لأنك ستقرأ فيها اشياء واشياء واشياء مفيده ومهمه .. وفصلاته خرافيه ..
بحق نافع استاذ جميـــل واعترف من هنا وبكل مكان تتلمذت على يديـــه في معرفة التفاعيل والتقاطيع العروضيه
والبحور .. كنت اكتب الشعر بلا هدف ولا معرفه فقط وزن وقافيه الى ان جمعتني الصدف بنافع التيمان في احدى
المنتديات الأدبيه .. وفتح لنا الله يذكره بالخير اكاديميه لتعلم فن كتابة الشعر واصبح يعطينا اختبارات كان نشيط
جداً وقتها ,, الآن مدري وش اللي جرى له <<< احد صكه بعين
اذكر احد الأختبارات اللي اعطاني ابيات جلست اضحك واقول في نفسي هذا استاذ مهبول وطلعت بالأخير انا الهبلا ..

اختبار نفوع لي قال اكتبي على هالبحر /

السبت صار الاربعاء == والثـلثـا صارت احد
الهي يارب السماء === مـدد مـدد مــدد مـدد

وبعد خمس دقائق جاء ردي عليه بالتالي /

اليوم يمكن ربما ×××× اتـعـلـم الدرس واشـد
ابحر ابـْحرك كلما ××× دخـلـت عنــدك واجـتهـد

وطبعا شاطره انا نجحت وفرحت كثير .. واحتفلت بالمنتدى بس صدمني وطلب اكتب قصيده كامله على البحر
واعطاني نصف ساعه فقط /

وكتبت .. كنت مدري شنو اكتب واي موضوع او فكره اكتبها <<< حشرها بو اسامه
وطلعت مني هالأبيات اللي مدري كيف جبتها /

(( حايل ))
الله .. يــازيـــن النـــدا
فوق الزهر معه البرد

جـــمال رب ن يعبـــــدا
ماهو رســم فن ٍ بْـيــد

ريــح النفل لا من بـــدا
عطر ٍ تشـــٌمه للأبـــــد

خيـــال .. ياخـــذني مـدا
لـْديرة هــلي ..طي البـلد

حايـــل بروحي له صــدا
مرباي عشقي له شهد

الطيب لرجــــاله غــــدا
بصمه لـْشـيـبـان وولـد

يـفــدون ناصــيها فــــدا
بالروح ماخانـــوا عهد

حاتــم عــلمهم يـقـتــــدا
مافــيهم لقــرشه رصـد

شــموخهم فـــوق العــدا
الروس مرفـوعه مــدد

اعــزف لحوني وانشــدا
ماغــيرحايــل لي بـــلـد

الله يذكره بالخير .. ما طلع نتيجة الأختبار الا بعد اسبوع من نزلت القصيــــده بغيت افطس
وكنت راح اعتزل كتابة الشعر لو ما نجحت بالأمتحان .. والحمد نجحت بس للحين ما اعطاني
شهادة التخرج ابو اسامه ..

نافع يا محمد ثروه ثقافيه هائله ولكنه كسول جداً .. اتمنى من خلال بلا موعد ولو قرأ كلامي ان
لا يبخل علينا بالذات في قصائده النبطيــــه وان ينفض غبار ادراجه ويثرينا بفكره .. فـأنا ما زلت اتعلم من مدرسة هذا الرجل ومن
المدرسه التيمانيه عموما ..

ووووووه قطعت اناملي << حلوه اناملي
تعبت يا محمد



وراح ارجع اســألك .. عندي اشياء كثيره ودي تفتح لي قلبك فيها بس شوي وارد لك

قبائل ورد لقلبك محمد