ورده رقيقه ..

[تفاصيل منسيه]

السلام عليكم ورحمة الله وبركاته
أبيات عجله لتجديد العهد معكم .. واثبات الولاء لهذا الصرح الغارق في العذوبة
أبعاد أدبية..
أعذروا تقصيري ,, وتقبلوا مني هذه البسيطة

أقول :

الصبح (عادي) لين تحضر مع الناس
جملة ((صباح الخير)) تصبح حقيقه

ياللي حضورك قادر يبدد اليآس
ويجدد عهود الأمل في دقيقه

انت الصباح اللي تكلل بالاحساس
وانته تفاصيل المساء الانيقه

تضحك !! يميل الورد ويغار الالماس
من بسمتك ؛ لنها تضاهي بريقه

تغضب !! يثور بداخلي نبض وانفاس
وتشب لك بأغصان صدري حريقه

ترحل !! تدق لبعدك بقلبي اجراس
تعلن رحيل السعد وحلول ضيقه

ترجع !! يزول بشوفك ألفين هوجاس
وتداوي بصوتك جروحي العميقه

(حبك) عباره يضمها جوز اقواس
قد قـلتها لك بألف معنى وْطريقه

(لا له وصف .. لا له دلاله او قـْياس
حبـّـك بـ كف القلب ورده رقـيـقه

ورده سقاها من وريده بلا كاس
ظامي ولا يلقى من يبل ريقه)

اسمع ((صباح الخير)) كذبه من الناس
وانت الوحـيد اللـي تـقـول الحـقـيـقـه

...

وسلامتكم
14 نوفمبر 2024