محبّة مالها تفسير !

[حسام المجلاد]

حبيبي ماعرف وش كانت الدنيا قبل لاماك
سوا ليلٍ لحق عينه نعاس ونام بأجفاني

أسكّر عَـنْه بيباني .. ويتسلّل ..مـن الشباك
وإلى منّه سرق مفتاح باب النّور خلاني !

هلا بك يوم ناداك الغرام .. وجابك من اقصاك
كثر .. ما بهجتي في جيّتك تَشْمَت .. بحرماني

هلا بك .. كثر ماخفت العيون العاذله تقراك
بوجهي .. كل ماحاولت أداري ربكة أشجاني

حبيبي .. والاراضي يحْسِدنّ ارضٍ تحت ماطاك
إلى منّك مشيت .. وكلّ درب يغايض الثاني ..

.. جمادٍ لو عطاه الله يدين إلّا يضمّ خطاك ..
ولو يملك لسان .. إلّا ينادي .. لا تعداااني !

اجل وشلون انا .. والقلب تدري فيه .. مثل الراك
إذا هب الحنين .. إهتزّ .. كنّه ذاوي أغصاني !

حبيبي لا تكرر غيبتك.. ماخفت يوم انساك
أخاف الهمّ ..يذكر سيرتي .. والصبر ينساني

أنا من غبت عني والمدى حولي غدى محيّاك
وصرت أربع جهاتي ، قبلة أشواقي ، وعنواني

تصدّق ياحبيبي صرت في كل الوجيه القاك
تحاصرني .. مثل ماحاصر التّحنان وجداني

اشوفك حاضرٍ بوجيه خلّاني .. هنا .. وهناك
واشوفك في وجيه عداي .. ويصيرون خِلاني

محبّة مالها تفسير .. واستعصت على الإدراك
جهلت اسبابها .. لو زاحَمَت دمّي .. بشرياني

أحبّك .. -والبهاء- اللي في زعلك مشابهٍ لرضاك
وش اللي مالي عيوني سواه وعاقد لساني؟!

كأنّ الحسن أخذ من كل ربّة حِسْن/حِسْن وجاك
يبي يعطي .. وشافك ..واستحى من جيّته عاني

لقى كل الحلا فيك .. وحسدك وقال :يا ما احلاك!
ياليت الله يوم أغناك .. في بعض الحلا أغناني !

أنا تـوّي ..شعرت بـقيمة الأيام ..فـي لقياك
هلا بك كثر ما مِت بجفاك .. ووصلك أحياني

مادام الشوق جابك .. والهلا يافاتني تزهاك
هـلا بك مــن هـنـا .. حتى أقهر بترحيبي أحزاني!!