مياسة !

[سعد البردي]

‏امشي بِتَبَختُر على الشطآن مياسةْ
جمع النوارس من اقبلتي* يحيونّك

البحر من شاف ظلك انحنى راسه
و الموج ودّه يطير ويسكن اجفونك

ما انكر بأنك ذهب عمري والماسه
ولا انكر بأني عطيتك عهد ما اخونك

لكن كسرني غيابك في تغطراسه
وأنا معوّد على رِقَتّك وليونّك

واليوم قلبي غدى ياكِلْهْ هوجاسه
مدري هو أقصاه عندك أو رحل دونك

عجزت ابنسى غرامك لعن أبو ساسه
وش حدني في غلاك وصرت مفتونك

حسبي تعلّمت و الأيام كراسه
تجارب العمر تكتبها ويقرونك

ومن لا تلهف على شوفكْ تحمّاسه
تلقى بغيره هوى ناسٍ يودونك

لا تقول احبه وخله في تِهِجَاسّه
عليش تركض ورى من لا يراعونك

لا تجبر احساس من لا يجبر اِحساسه
عليك لوّه عليك أغلى من عيونك

الناس ما هي جميع الناس حسّاسه
والخلق ما هي على كيفك ولا لونك.