نجوم القايله!

[حسام المجلاد]

صحيح قالوا ما على الدنيا ضمان
ماتستقيم .. إلا تعوّد .. مايله

كم واحدٍ فيها غدت عشره ثمان
ودموعه من صدوف بقعا سايله

وأنا ليامن خفت .. حَصّلت الأمان
عند الذي ما مَلّ كثر دعاي له

ماقال خذ موعد ولا بالهرج اهان
كرامتي يوم آعرض شكواي له

الله ولا غيره.. وليّ .. ومستعان
مشرّع الأبواب للي جاي له

ولّا آبن آدم لو هو فلان الفلان
تلومني نفسي على ممشاي له

كل اليدين قصار لو ما الله اعان
.. إلا يد المولى تعالى طايله

كبّرت باسم الله وأعتى خَطْب هاان
ما اخشى من الأيام وش هي شايله

إن عشت بإذن الله غير احيا حصان
وإن متّ يومي والخلايق زايله

وإذا رضى معيشة الذل الجبان
واذعن لصكات الزمان الهايله

انا رفضت آقبّل كفوف الزمان
اللي موريني نجوم القايله!