السلام عليكم ورحمة الله وبركاته
دمتم كما أنتم قامات نتشرف بوجودنا معكم
وعذراً على الغياب
لا تسأليني عن سبب غيبتي ليش؟
يمكن سؤالك هو نذير اعتزالي
ما كل جرح .. يسيل دمه ليا نيش
أحيان كلمة .. تجرح انسان غالي
بعض الكلام ينقّش القلب تنقيش
تكفين .. لا تطرين ذيك الليالي
ودي أطنشها .. ولا فاد تطنيش
ملازمتني .. كنها من ظلالي
يا زينها وحنا صغار .. ودراويش
والفكر عن هم الزمن كان خالي
يا غالية .. لا تسألين المطاريش
ماني قريّب .. لو لمحتي خيالي
يا غالية طويت أنا صفحة الطيش
أخاف .. يقرون القصايد عيالي
بالمختصر تكفين بشويش بشويش
لا تحرجيني .. فوق حد احتمالي
أحيان حلمي فارسٍ ينطح الجيش
وأحيان حتى الحلم، يرأف بحالي
ولو كان همي بينهم لقمة العيش
ما فوّحت .. نيران كيفي دلالي
طهر المشاعر .. غير طهر الدشاديش
ودرب التواضع .. عكس طبع التعالي
ساقوا على علم المغانم بخاشيش
وأنا دفعت لعلمها .. راس مالي
فزّاتهم يا غالية .. فزّة كديش
وانا على سرج الاصيلة .. لحالي
ما فادت الاتراك .. كبر الطرابيش
ولا طهّرت طهران .. كثر الملالي
ولا يهمونك .. طيور الخفافيش
وأنتي مكانك .. دايم الدوم عالي
هذي مشاعر شاعرك دون تشويش
وعندي طلب يا غالية حيل غالي
عيشي حياتك .. واتركيني انا اعيش
حكم القدر .. ما اقدر انادي تعالي