كل ماحلم انكسر به قال خيرة
___ ويووووه كم حلمٍ حلم به وانكسر به
ويوووهً كم شيٍ بغاه وخذه غيره
___ وكم فقد غالين او شخصٍ يحبه
وكم دفن في خاطره رغبه كسيرة
___ مادرا له حد او غيره شعر به
كل ذكرى لو تمره تستثيره
___ لين يفقد غايته ويتوه دربه
رغم ان الارض كانت مستديرة
___ مالقا نقطة نهاية وارض خصبه
وكانت دروب الوصول وخط سيره
___ عكس بعض ووجهته بالحيل صعبه
من طريق إليا مطار اليا جزيرة
___ شايل شناط الندم وحمول ذنبه
ذنبه إنه كان يعطي من ضميره
___ مادرا ان الوفا والحب كذبه
صدقوها الناس قبل بكل ديرة
___ واكتبوا فيها قصايد عشق عذبه
ومثل غيره عاش للحظة الأخيرة
___ ينتظر صدفة تجيه لباب قلبه
تفتح المغلق وتمحي كل حيرة
___ تسقي جذور الامل وتبل عشبه
وتنتهي اغلب مواجعه الكثيرة
___ وكل هم وكل شوق وكل غربة
وتصبح احلامه على قده كبيرة
___ هو كبير بعين نفسه رغم غلبه
وكل ماحلم انكسر به قال خيرة
___ يخلف الله والعوض من عند ربه
أحلام مؤجله