وش انت غير انك حكايه عجيبه
__ فيها مزيج من العقل والشقاوه
إذا رضت ترفل بضحكه رحيبه
__ وان اغضبت فيها الحلا والطراوه
تشكيلةٍ سهله، وجداً عجيبه
__ أجواءها بين المطر والنداوه
معجونة بالضّي ترفه، حَبيبه
__ تجمع حكايات المدن والبداوه
كالأرض إن جفّت تهادى خِصيبه
__ كالورد إن فاح العطر في حلاوه
ريّانةٍ حلوه، لطيفة، خصيبه
__ إنتاجها مممزوج حب وهداوه
متميزه فكر وحضور ومَهيبه
__ متحيّزه للطيب جود وحفاوه
إذا أقبلت تأسر قلوبٍ رِطيبه
__ وإذا أدبرت تدلّلت في صخاوه
أحبّها حب المعنّى بْطيبه
__ وأعيشها رغم الجفا والقساوه
•
•
[ شيخه الجابري ]