00 مركب الروح 00

[عودة نزال]

[POEM="font="Arabic Transparent,5,black,bold,normal" bkcolor="white" bkimage="" border="double,9,sienna" type=2 line=0 align=center use=ex num="0,black""]

ياللي تأمّل مركب الفكر والروح = دام الهوى بكفك أبفرد شراعي

أبيك تبحر في طباعي على ضوح = وأبيك تغْْْفَى في دجى اقصاي واعي !!

وأبيك تلقى مسلكي برقه يْلوح=إذا دعاك مْن المتاهات داعي

ياصاح دامك جيتني كلك طْموح = في رفقتي .. ما لأبيض الكذب داعي

أنا ترى هذا أنا وين ما آروح =وفاي : قنديلي .. وصدقي :شعاعي

أكذب عليك إن قلت أنا كتاب مفتوح = واكذب عليك ان قلت صعبه طباعي

مرات أكون أعنف من إنسان مجروح = ومرات أكون ابسط من أحلام ساعي

في داخلي صمت المحبين والبوح = وفي خطوتي صوت الدليل وضياعي

تشوفني غامض وانا كلي وضوح= وتظنني واضح وهذا قناعي !!

هنا .. أجي يأس ونهايات وجروح = وهناك ..مثل الناي بكفوف راعي

يعني تخيلني كذا .. لغز مشروح =مشروح .. بس دوني تموت المساعي

ياصاحبي مابين مبهم ومفضوح =تابع متاهة رغبتي وامتناعي

ياني خجول الظل والطير والدوح =وياني جرئ وفوضوي واندفاعي !!

أحيا هوى وانا من الحب مذبوح = وأموت سم ولا حيت بي أفاعي !!

في فرحتي تهزني همهة نوح=وبارق سعد ينتابني فــ إلتياعي

يسيل حرفي في مدى النبض بجموح=وينبت بنفسج حيرتي وسط قاعي

لو بحت.. ماقلت الحزن وقت ويروح =ولو شلت .. خفت الحزن يلوي ذراعي

أدري غريب وغربتي : ( بيد وصروح) = لكن ورغم الوقت يبقى اقتناعي ...

أعيش واحد .. أشرب الصدق وأفوح =طيبي .. ولا أعيش بضماي اجتماعي

ذي رحلتي وقل ماتبي : جد ومزوح = بس لاتقول أن التعالي متاعي

ياصاح .. وان شفت أكثر الصمت مبحوح = اسمع نداي ان كنت غاوي سماعي

أنا مثل ماقلت .. والحرف مطروح = شفني .. ترى مليت احسّب وأراعي

إن جيتني خل أكبر الذنب مدموح = وأنا ابفرد للمحبة شراعي

وان رحت عني قلت : مسموح مسموح = اسهل وداعات الأحبة وداعي

بس لا تعلقني على مركب الروح =اما انسني .. ولا تحمّل طباعي

[/POEM]