قراءات :

[عبدالله عليان]

اشهد ان الجمس وحده جديرٍ بالثقه
صاحبٍ دون الآوادم نخيته واستجاب
يوم خانوبي لقيت العزاوي بشْنقه
ماقسى قلب الحديد وقسى قلب التراب !
ياسقى الله كل دربٍ مشيناه رْفقه
بين سجات الصحاري وهقوات الهضاب
صاحبي للبعد صاحب فتنّي منطقه
بارعٍ مايوم جنب مداهيل الصواب
جمسٍ احمر كن ربٍ خلق مي خْلقه
صاغها من نهر فضه وصاغه من عذاب
احمرٍ حمرة خدود الهنوف المطرقه
مير فعله فعل قرمٍ عصيٍّ مايهاب
في سكونه قلبٍ ابيض وعين مْغورقه
وفجنونه طيشٍ اورق على دمعٍ يباب
مقبلٍ كنه من الدم قطره بْورقه
مدبرٍ كنه على الظن دلوٍ في سراب
ساطعٍ كن البروق بْنحره معلقه
هادرٍ كنه يزايم مراويح السحاب
والله اني لاهمزته وجت له رقرقه
خلت بقزوزه عبيدٍ ترامى بالحراب
وان نخيته فزّ واقبل تقل فيه شْفقه
مدركٍ ليه انتخيته على عوي الذياب
كل ماشافت عيوني لها شيّ فْهقه
لين صرت احسب عيوني دعاوي بالذهاب !
مندفع كنه يفج الحماد ويرتقه
طايشٍ كم تاب واخطا ولا اخطا ثم تاب
كن الارض اوحت شياطينها المتسلقه
للسما والجمس كنه تداركها شْهاب
كم سريته والهجوس بْحشاي مْوثقه
كم تنادمنا ولا اذكر تنادمنا عتاب
ان لمحنا الظلع قلنا: جباهٍ مشرقه
والشجر لاهتز قلنا: تساقط ياكْتاب
مااختلفنا حين شفنا السما متفرقه
يوم نصف البدر بيّن ونصف الشمس غاب
كن هاك البدر طفلٍ تبلل بْعرقه
حين شاف الشمس بنتٍ تنام بْلا ثياب
لحظة تسوى ثمانين رجل بْبندقه
لحظةٍ ياما دفنها عن عيوني تراب
عشتها من دون صاحب ولا خل اعشقه
وانقضت ويّا سرابٍ نخيته واستجاب

تركي

حمدان