تستحق الكتابة

[عامر الأشجعي]

لعل الغائب له العذر أحبتي،

:

هذه إهداء إلى أصدقائي الأعزاء

( مهند البيالي، محمد الشمري، محمد الحربي)
:

:

حمام ياللي .. دون متن السحابة
مدري صباح الخير مدري مسا الخير

:

:

وشفيه حزنك مثل حزن الربابة
لا جرها العاشق بعد حزّة عصير

:

:

انا وخوي الدرب .. جينا رتابة
نبي نغير شي .. يحتاج تغيير

:

:

امشي على دربٍ رفيقي مشى به
لو كانت الخطوة بعيدة مشاوير

:

:

نمشي على نهج النبي والصحابة
بأمر الوليّ وتحت حكم المقادير

:

:

مرت ثلاث أيام، والقلب مابه
الا الوناسة والفرح والتباشير

:

:

قابلت ناسٍ .. تستحق الكتابة
ناسِ لهم بالقلب حشمة وتقدير

:

:

ما تسمع الا مرحبا يا هلا به
خلّان ماكنّا عليهم مسايير

:

:

والكل منهم عزّ .. من عزّ لابه
وانا اشهد ان الطيب فعل المناعير

:

:

ماسكّر الطيب عن الناس بابه
ولا يحسب حساب الكرم والمخاسير

:

:

صدورهم مثل السما بالرحابة
وقلوبهم مثل السحاب المسافير

:

:

ماهو صحيح أن الاوادم تشابه
واكبر دليل الطير مايشبه الطير

:

:

حرٍ فعوله تلجم اللي حكى به
وصيد الجزيلة غير صيد العصافير

:

:

وانتم ورب الكون فعل وذرابة
ولا حصل من جيتكم أي تقصير

:

:

ما ينتقص من قدر غالي غيابه
تكفي مراسيله .. بليّا معاذير

:

:

لو يمتلي صدري حنين وصبابة
معكم فلا يحتاج للوضع تبرير

:

:

وصلوا على اللي دعوته مستجابه
عداد ما ندعي بسجدة وتكبير