أمـي

[بدر الحنيف]

:::


أسعد الله أوقاتكم بكل خير


أتمنى ان ترتقي الى سمو الذائقة




الشعر هاض وجابه اللي جابه
يوم اعتلا به هاجسي مرقابه

وبدا يمد من الجزيل احساسه
لأصدق غلا واصدق شعور أرتابه

ويمك يا يمة من بدا يكتبني
شعرٍ بـ طاريّك تفوح اطيابه

وشفت الشعر في رهبة ٍتجتاحه
وانا بـ شعور عاجز استيعابه

ما كنه الا نشوة/ن تاخذني
على طريق ٍ ما حسبت احسابه

بس اسمحيلي يا(أم سعد)من فضلك
شاعر وما في خاطره غنابه

يمه .. وصوت العاطفه مسترسل
ومن شاف ذكرك للسما يرقابه

وشعر .. ما يبهج خاطرك لاقلته
يحـّرم عليّه نطق وألا كتابه

يـ النادره وام الحصان الحره
يا ترثه اسقام العدو .. وارعابه

انتي من عيون الفخر في وايل
من قوم يعرف مجدهم بـ قبابه

وجه الشراسه و السطر والسطوه
والموت معهم عينه .. ومخلابه

(غبين)في بنت الحصان ان ركبوا
ما مثلهم بين العرب ركابه

مثل الصواعق بـ الوغا لا ثاروا
سم ٍ سقطري خصمهم يبلابه

أرهاب بـ العصر القديم الفايت
قبل الزمن هذا يجيب ارهابه

مضرب مثل بين العرب مدتهم
يوم العرب بين الفقر والغابه

اهل العطيه والكرم يتبعهم
هم اطول اجباله وأجل اقرابه

علامةٍ بـ أسمائهم محفوظة
المجد دّونها غلاف اكتابه

ومن الغبين للفخر منسبها
نعم النسب وإليا افتخر نسابه

وعقب الفخر في منسبك وعروقك
فيك الفخر يرجع يزيد اسهابه

بـ أطباع جسدها العفاف الطاهر
وفعل الحساني طبعها يرقابه

طبع ٍ من المعروف كل دروبه
عسى صلاح اعمالها تجزابه

يـ الغاليه بديت اشوف اقدومك
يشبه قدوم المزنه الصبابه

يا ضحكتي يا بهجتي ياروحي
عليك عمري لذته واطبابه

لا يا شعرة قلبي ونبض عروقي
يا عين ابوي وسلوتي بغيابه

يا خزنة العطف الرقيق السامي
بك خاطري يلقا الرضا وارحابه

بك ريحة الجنه وطهر الدنيا
ومفتاح رزق ٍ ما ترد ابوابه

وبــك زينة ايامي وبــك بهجتها
يا سيده عالم بدر واحبابه

يا علني ما افقد لـ شوفت زولك
يا أغلى بشر فوق الثرى واترابه

اقرب بشر فوق الثرا مقداره
عندك ما عادل انمل السبابه

(بدر)لا شافك شاف فرجة همه
ويهدا به المتوتر من اعصابه

في شوفك علاجٍ لـ ضيقه صدري
في شوفك ألوان الفرح واسبابه

في ضحتك اشوف ضحك ايامي
وتزيل عن ين يومي ثقيل اتعابه

والله لاشفتك راضيه فرحانه
كني ملك واللي تخدمه لابه

الله لايحرمني رضاك وشوفك
وضحكة حجاج ٍما قطع ترحابه

الله يا ميتي بالعمر يمهلك
على العوافي والستر واطيابه

هذا فخر واحساس روحي قلته
على شعورٍ عاجز استيعابه

وصوت العواطف جاك في تعبيره
شاعر ما في خاطره غنابه

حتى الشعر لا جاك طعمه ثاني
لانه لقاك ابهى الحلل بـ إثيابه

وشعري اذا ما يبهجك لاقلته
يحرم عليّه نطق .. والا كتابه





دمتم بود ،،