تعب..! واستنزِف جْروحي واعوّدني على الكِتمان
واشوف انّ الشّعر أكبر من الكِتمان واحْزانه
أفضفض للورق واكتب واقول ان الحكي أغصان
يرفرف للسّما سربٍ يطير ويترك اغصانه
كتبت وما معي غير القصايد والشّعور ( انسان )
يحاول يكسر بْخاطر قصيد .. ويكسر اوزانه
ظما..! واتلمّس عْروق الغمام بْكفّي الظميان
واحاول ألْمِس كْفوفه و افكّ ازرار قمصانه
وحيدة..! مامعي حاجة سوى الخيبات والأحزان
أخبّيهم بكرّاسي .. وتنبت شِعر باحْضانه
غريبة..! فِـ الدروب اللي تسولف لي عن الأوطان
زهابي دمعتين .. و جرح قلبٍ ملّ خذلانه
دموعي كحلة عْيوني .. و حزني للفرح فستان
أشوف مرايتي وابكي .. وامسّح دمع بارْدانه
تعال انفث على قلبي .. تعال وسمّ بالرحمن
طلبتك يالفرح تكفا على شاني .. على شانه
عجزت اكتب .. وقلت ارسم حكاياتي بلا ألوان
وبيت. . وغرفة .. ودرفة .. واعلّقها بجدرانه
تعبت استنزف جروحي واعوّدني على الحرمان
واشوف ان الألم أكبر ولو حاولت كتمانه
أنا ما عاد اسولف للورق عن قصة الخذلان
أنا صرت احرق أوراق الشِّعر واقصّ جنحانه
نوفمبر 2023
تويتر
https://x.com/too_simple_girl/status...691991631?s=46