[عبدالله العتيبي]

[poem=font=",6,darkred,bold,italic" bkcolor="transparent" bkimage="" border="none,4," type=0 line=1 align=center use=ex num="0,black""]
لاضاق صدرك واتعبتك الهواجيس=وهبّت عليك رياح بقعا سمايم
اكفخ كما القرناس يوم القرانيس=تكفخ بعرض الجو لا صار غايم
وانزل على بلقع من اعوام ماديس=ولا ساقت الرعيان فيه البهايم
قفرٍ من اول زارها امرؤ القيس=وسجل بها التاريخ عصر العمايم
وبنى خيام بعاليات الاطاعيس=يوم الطرب والثأر جاله زهايم
وش النتيجه من ورى لقطة غليس=قولوا اذا ديس الشرف باللمايم
وإسئل عن المهمه وتاريخ بلقيس=يوم الصدى والبوم فوق العلايم
تروي ضمى ما تنبته ظامر العيس=وتعطش كبود مصخّرين الشكايم
ومع ذا غلاها يبّس الريق تيبيس=واصبح سليم الفكر بالبيد هايم
في صبحها تلقى الهوى والنسانيس=وفي ليلها ضوء المعاميل دايم
تشتم فيها شيح وربل وبسابيس=وعنّاب رطب تهز جذعه نسايم
وعبيثران أطيب من ورود باريس=وسمحٍ ورقروقٍ لذيذ الطعايم
كانت ملاذ اهل النقاء والنواميس=صعبة ولكن أرغموها رغايم
وكانت ولازالت بلاد الأشاويس=تشهد فعول صقورهم بالحمايم
من حد شاروره الى نهر برديس=أرض العرب سطوة غلاها جسايم
لجبالها ولهضابها بالتضاريس= تلقى اثرهها بحضن الايام نايم
مرباع قومٍ اعطوا المجد تدريس=يوم العظايم مالها إلا العظايم
تاريخ حافل ما يجي فيه تدليس=مثل الثريا او شباط النعايم
احب انا الصحراء بكل المقايس=لاضاق صدري رحت يم الحشايم
رجالٍ صغاره من كبار الفواريس=وبخيلهم يُعرف بجزل الولايم
مايسمعون الهرج خلف الكواليس=ولا يتقنون إلا فنون اللزايم
ومايدفنون الكيس يومٍ هل الكيس=أيجمعونه من هوان ورمايم
من رام راس الطايله والغطاريس=يبني قبل بيت القصيد القوايم
وانا بنيت من القوافي متاريس=وأبهمتها عن فكر بعض الهلايم

[/poem]