ياليت لي قدرة على بيع الأحباب
وأبيع خلن بالهوى مانصفني
ابو ضفاير مييز بسود الأهداب
الي خذى جل المفاهيم مني
الي عشمني بالهوى واغلق الباب
ليته رحل من قبل وده عشمني
ماخاف ربه يوم صرح بالاعجاب
تحايل بطيب وخذا النوم عني
اسهر واعد الوقت موقن ومرتاب
موقن رجوعه لكن اخلف بظني
انا اشهد ان الحب ياسعود غلاب
والحظ مايوم بوفاه انتثلني
كنت القريب وصرت معه امنالاجناب
وبالامس كنت اقرب قريب ونكرني
غريب طبع احبيبي صار كذاب
عقب الوفا والطيب طيبه سلبني
ياليت وقتي ماتزهل ولا جاب
مثله ولاذقت امتحانن محني
مايوجع العاشق سوى الظن لاخاب
ولايقتل المشتاق غير التمني
سجلت من روحي قصايد على اكتاب
عنوانها مجروح ظبين فتني
خطيت من بدع الهواجيس ما صاب
قلب المعنى يوم جرحك سكني
واختامها مجروح والجرح ماطاب
واهموم بقعا بالغموم ابتلني
جرحك معي مثل الميع من الناب
لو ابتسم قالوا ضحوك امتهني