احبتي جميعا اسمحولي ان اقدم لأهدابكم..ولألبابكم هذه القصيده
التي اتمنى ان تستحوذ على اعجاب ذائقتكم
( مروحه )
مروحه
ولا استوحى ابمروره اي شي
وروّحه
وهالمروحه زادت عناه ابهذي الضوضا
واهي متمرْجحه
كم مره تقطع حبل افكاره خطا
وتقسا عليه
كم مرّه اتطيّر من اكفوفه
عصافير الكلام المشتهيه
كم سطْر يابس ريقه ...متسمّر عطش
ينطر يمرّه ابماي...فيه ؟
ويجرحه...!!
حياة هذا الحرف انّك تذبحه
موته ابوضوحه ..
ايّاك حرْفك تشرحه ؟
ولا تضحكين..!!
لا قلتلك هالسّقْف ذا مسكين
من قوّسه ابقوسين
صيفه وعناد المروحه
انا قلت ابكتبلي روايه وماقدرت..
انا قلت ابكتبلي قصيده وماقدرت..
انا قلت ابكتبلي ولو بيتين يومنّي سهرْت
وذاب شمعي
ومدّت اطرافه السطور
ومال فرعي
وانقطفت
شكثر افرح لا كثرْت
ابمسمحه ..!!
شوفي كم راكب اباّص المصلحه؟
وشوفي كم واقف ابتانيب الضمير
رنّة الخرده ابكفّين المحصّل ماتفيد اجيوبنا
رنّة الخرده ابكفين المحصل ماتشير اجيوبنا
ووضْعنا ماينفعه قانون سير.....ويصْلحه
هالهوى ذكّر صرير الباب فيني
ياااااه هذا الصوت كم طيّر وجوه
ابرمْش عيني...وسيّحه
لا ترتبك
ياهالمسا الغافي على اوجوه الزوايا
يمكن اقدر اكتبك
واستوعبك
في سطر من دفتر القمرى
يرتاح كل كاتب اذا يُقرى
كثيييير ....ويفرحه
استهلكت هذي المدينه الناس والألماس
والاحساس...غادر مطرحه
ماديّه ابوجهها هذي الملامح
والمسامح
صار فيها مو كريم
واصبح المغتاب مقدام وفهيم
وترتقيه....الاوشحه
من تستشفّي هالشذا بشويش
ياهي ثقيلة لقمة العيش
عأظهور ناشٍ شايمه
عن ذلّة البغشيش...!!
من كؤوس المصلحه
ولعيونك ..اورود السطور ..امفتّحه
عبدالله صلال العساف