[الغيد بنت فواز]

لأنك حلم - { و أغلى حلم ..!



تعابيـرك و لمحاتـك بـرود الليـل وسكوتـه
- - - تهيّض بالشعر وجهـه توّردنـي علـى شفاهـه

وتعلقني مع الصوره ، بيوت أشعـار موقوتـه
- - - وأضيّعها مع التكرار ، وانسى الحرف وأشباهـه

ولا أدري بأي صيغه،أرتـب حرفـي وصوتـه
- - - وأوّصل لك مع صوتي ( جنون الشوق والآهه )

كذا هالليـل يبدانـي عمـر ساعـات مبهوتـه
- - - كثر ما تطول في صبري ، كثر مافيك ( دلاّهه )

أساهرهـا علشانـك والبْـس طيفـك بشوتـه
- - - وأجهز لك عروس الحب جفن وعيـن / نبّاهـه

أبيك تشوف بعيونـك رمـوز الـود ونعوتـه
- - - وكيـف انـك تخلينـي بطـول الليـل توّاهـه

أضيع ْو - وحدتي تقسى وأنا للخـوف تابوتـه
- - - عجـزت أزيـح غربـال ٍ يكّفنّـي بإشـراهـه

تصّدق قمـت أدور بْغرفتـي والحبـر والنوتـه
- - - معي تستجمع أشعاري ، وحبري منكسـر فاهـه

وبعدما داعب احساسي نعـاس النـوم والموتـه
- - - تسلّمت و خيوط الحلم ، تعرض وجهك وْجاهـه

ونامت عيني وبخـدي أثـر دمعـات مكبوتـه
- - - بعدما ( ضمّها ) جفني ( غدَر ) هالدمع بإكراهه

لأنك حلم / وأغلى حلم / جبرت الصحوه تفوتـه
- - - وقلت أن مالقيتك علم / بأحس ان الزمن عاهه !