[حسام المجلاد]

يا موطن الروح عنّك دون حول اغتربت
منفي؛ والأحزان في منفاي خاويتها

وفي رحلةٍ هيّبتني من قساها وهبت
جرّبت جور الليالي لارحِم ميتهاا !!

الجرح بالقلب وبصدري من الضيق كبت
وعن حاسدي؛ دمعة الخذلان خبّيتها !!

واحلامي اللي على تحقيقها كم تعبت
في مقبرة صدري مْن اليأس واريتها !!

كم مرةٍ قلت ابغلب هالظروف وغِلبت
وكم ونةٍ من صميم الروح جريتها !!

لاتْلومني لا انعزلت بوحدتي واكتئبت
شيّدتْ؛ "دار المحبة" وانت هديتها !!

يطربك حزني وانا منّه ماعمري طربت
ياللي سكاكينك .. افرح .. لاتلقيتها !!

خابت هقاويّ ياملهم قصيدي وخبت
الخيبة اللي .. بعُمري .. ماتمنيتها !!

قالوا لي الحب ذنب وقلت عاد ارتكبت
أطهر ذنوبي؛ ونفسي بعْده احييتها !!

وعنّيت للجادل اللي تبتعد لا اقتربت
شعري؛ ورجلي على المجهول سرّيتها !!

كذّاب من قال بإنّي عن محبّتك تبت
ياللي محبّتك؛ وسْط الرّوح ربيتهاا !!

وكذاب من قالك طابت جروحي وطِبْت
ما والله تطيب غير إن جيت داويتها !!

سقى الله ايّام؛ لامِن جيتك وقلت جبت
قصايدٍ فيك تطربني .. وغنّيتها !!

واطربتك ليا قصدت؛ وْلا حكيت إنطربت
حلوه سوالفك .. وبنبرتك حليتها !!

ياحلوك ليا رضيت وحلوك ليا غضبت
ياللي بهالجوف نار الوجد ، شبيتها !!

ماكنت شاعر؛ ولكن يوم لأجلك كتبت
زعّلت شعّار منّي؛ وإنخرب بيتها !!

ويوم الليالي خذتك وقَدّر الله وغبت
كتبت ما أبكاني؛ وخلق الله ابكيتها

وين انت ياللي تساهلت الغياب وهربت
يا الأزمة اللي بموت ولا تعدّيتها !!

ظامي مواصل؛ ولأذكر يوم 1 شربت
والعين ذابت؛ تبي ترواك واظميتها !!

حبّيتك بصدق؛ يشهد خالقي ماكذبت
حتى طعونك ورَبّ الناس؛ حبّيتها !!

ولو ماتربّع غلاك بْداخلي .. ماسكبت
دمعي؛ وانا مِن رجالٍ ذايعٍ صيتها !!