برضو مسنده للشايب الأزعر
ياراكبٍ من عندنا فوق نيسان
__________ ددسن ، ركوب اللي على قد حاله
ددسن ولكن لونها سيد الالوان
__________ أسود سواد الليل .. لون الوكاله
تاعي حكم هتلر على دار الالمان
__________ يومٍ " تشرشل " بالرديه نوى له
خجمه ولكن بالسفر شانها شان
__________ تدحم صحيح ... وضاريه للرزاله
سواقها فقري ولاهوب فسقان
__________ لاشاف له عبري على الخط ، شاله
قرمٍ والى من حط له كرز دخان
__________ لو ترسله للبيت الابيض ... عناله
ياسايق الددسن أوصيك يافلان
__________ عندي رساله .. واحتفظ بالرساله
الين تاصل وسط مجلس بليهان
__________ ديوان ( موسى ) .. مايبيـله دلاله
مدهال طيب ، وللمناعير عنوان
__________ في مجلسٍ .. تعجبك .. صفة دلاله
من لابةٍ لا عدوا الطيب فدعااان
__________ اهل الكرم والجود .. واهل الشكاله
تلقاه في شوف المسايير فرحان
__________ ياحي فال ( العود ) .. ياحي فاله
والادمي وشو بلا قلب ، ولسان
__________ لو هو .. يحسّب .. بالملايين ماله
قله ترى وزير الاوقاف ، هويان
__________ على هنوفٍ .. تشبه ( البرتقاله ) !!
الجادل اللي مسكنه دون عمّان
__________ خشفٍ برى حالي .. برى الله حاله
ماهي مراقص راعي الذيب سرحان
__________ ولا هي سوالف صاحبي ( والبياله )
عجّل علينا بفزعتك يابن مشعان
__________ مادام .. فعل الطيب .. جاله مجاله
والا الجماله بس لشدوق سلطان
__________ ومستخطيٍ تكسب (بقرقط ) جماله
وش فايدة منصب ولافيه حلوان
__________ جتك القصيده .. واعتبرهاْ استقاله