يا الشتاء : لـ انفضّ سامر مرقدي
ـــ وودّعك حشْـد الرّماد وهبّ ريـح
اخطف أبيات القصيده من يـدي
ـــ واصرخ بلاصوت لعيوني , وصيـح
اخذ مشط البال , ليلك عسجدي
ـــ مايجيب الزين رجّـالٍ شحيـح
يازمن مافيك رجّال اجودي
ـــ وانت تعطي الاجودي معنى قبيح
هي ثياب الصدق رثّـه ياولدي
ـــ ولاّ سجّان النظر حُـرٌّ طـريح
مو ضروري حادي العيس يحدي
ـــ مو ضروي ناصح الزلّه نصيح
في بلد مليون شاعر مبتدي
ـــ ينضرب مليون شاعر في قريح
من يداري عاشقينك يابلدي
ـــ وانتي أكبر من زعل صدرٍ فسيـح
جبت لك عمرٍ خذا كلّ جهدي
ـــ شايلٍ وجهي واخاف انّه يطيح
يابلد : فـ ارضك يحسدون الردي
ـــ صافي أتعابه .,. مواطن مستريـح
يابلد : هذا ترابك سرمـدي
ـــ صورته طلح وشجر سدرٍ وشيـح
يابلد : محزون : وابشر بسعدي
ـــ دموع وديانك على شاني تسيـح
يابلد : محتاج ظلّك .. لايعدي
ـــ خلفي أفعى رملٍ تجرّ الفحيح
قبل حتْـف الصبح مرّك مولدي
ـــ طفل صدْرٍ نام واعياه الكحيح
راح يمضغ فـ اصبعه يحسب ثدي
ـــ مادرى بانّ الفقـر وجهـه كليح
اذكر أمّـي تبكي لطول سهدي
ـــ دايم تقول : الحذر ترقد جريح
ماحلم في هـ السماء كثر الجدي
ـــ ولاكتب غيّه سوى شاعر صريح
لو كبر من دمعتي جرحٍ ندي
ـــ مانقص من حسرتي عقلٍ صحيح
وقتي اللي عشت فيه بمفردي
ـــ انتهى : مافادني جمع المديح
يختلف في العشق ميقات وعدي
ـــ المسا يندب هوا الصبح الفليح
احتضرت بدوني وعشت بعدي
ـــ في جسد تحت الثرى ماله ضريح !