(خامس جهة)
للأستماع للقصيدة او تحميلها عبر الرابط :
مِنْ ( أ ) حتَّى ......
انا مَدري] لوين[ ؟!
مابقى في صفْحة الذَّكرى سوى
بنت ٍ نسَتْ في ليل ماطر
شالها وْراحت إلى ......
مدري لوين ؟!
صرْت( الفَّ) ...
وْصارت يـْـديني تشير لـْخامس جـْــــــهاتي
( ق ص ي د ه )
قلت لك :
حبيبتي الليل سجن ٍ من أرق
وآنا ورى سور الظلام
كونِيَ لـْـحزني حناجر
وْلو تـَعَبـْـتي من شتاتي
رجَّعيني لـْشارع ٍ
مايسأل اقدامي انا رايح ]لوين[ !
لجل امرَّ الذاكره
واغفى على الصمت الرحيم
ثمّ اطالع
والمدى جدران والكٌـوَّة عيونك
وابتسم ...إنـِّي اشوفك
ترسمين الشَّمْس قدَّامي واسير
بعْد وجْهك
ماقوَى النـَّـسيان يسْندني علــَـى جذع السنين
وْصرْت اطيح !
قلـْت : كوني لي ملاذ
دام كُوني ماترَك لي موطن ٍ أرْميني الليله عليه
قلتي : طيَّب
قلت : من غيرك يعاهدني إذا شاخت عظامي
وْمرَّت اقدامي تجرْجرها عصاي
ياخذ بْيدِّي إلى ركـن ٍ بعيد
فيه أتوحَّد / معااااااااي
دون ما انسان يدري
عن جهة كانت سماي
عن حبيبه
قايَضَتــْـني حْبال صمتي بالكلام !
وْقالت : احْكي ....
ما يشابه دربنا إلا الظلام
كم لنا والعمْر يعْبر فوق ظهـْــر احلامنا حتى انْحنينا !
واحنا احْنا ..
نطلق أسْراب الحنين لـْـقــبْلة النور وْنسافر بالجراح
في ( فمي ) ذكرى وفي ظهرك
ر
م
ا
ح
قلت : بنـْـزفـْني عليك
رتَّبيني بين ]صَدْر[ وْبين ]عجْز[
واكتبيني في جباه الرمْل شاعر
خاصم الريح وْبقى لك !
ظل يتيمم جفاف وشالك بكفه صلاه
___________ كان يستسقي عشان الشعر يورق من نباته
خطَّ لك تغريبة العمر العتيق وْما غشاه
___________غير وجهك والزمان اللي رحل مع امنياته
مد فكره حلَّق بحزنه وحيدٍ في فضاه
___________طايرٍ خلف السحاب يرددك في ذكرياته
كل جرحِ في حياته مرَّ منك قد نساه
___________والقديم اللي مضى ما عاد يزعج له مباته
علَّقي وجهه على الجدران لو غيرك نساه
___________ ورتـــــِّـــلي ذكراه لنجوم السما ولمِّي شتاته
بين دفتر ينحر اقلامه كسيرٍ ما معاه
___________غير قربان الحنين يقدمه عن جرح ذاته
السراج اللي احترق واهدى لايامك ضياه
___________ من يعوَّض له سنينه لا انطفى والحلم فاته؟!
صدقيني عاشقك ما سال غيرك من دماه
___________ جف شريانه ولاجفَّت حروفك من شفاته
ماشيٍ دربه رغم كل الرماح اللي وراه
___________ طاحت اغصان السنين وْما تخلَّى عن ثباته
يرتجف دربه طويل وْمادرى عن منتهاه
___________ من حطب احلامه بليلة شتا وانهى حياته
من خرير افلاجه لظلة نخيله في صباه
___________ مابقى له غير بنت ٍ تتبعه لابعد جهاته
شاعرٍ ينحت حروفه كلَّ ما دمعه عصاه
___________ من (أ) حتى حدود الشمس آخر اغنياته
شعر : عبدالعزيز العميري