منتديات أبعاد أدبية - عرض مشاركة واحدة - مكان.. بغرفتك!
الموضوع: مكان.. بغرفتك!
عرض مشاركة واحدة
قديم 03-22-2007, 02:58 PM   #1
مسفر الدوسري
( شاعر )

الصورة الرمزية مسفر الدوسري

 






 

 مواضيع العضو
 
0 مكان.. بغرفتك!
0 موعد
0 نعمة الأمن والأمان
0 نامي

معدل تقييم المستوى: 18

مسفر الدوسري غير متواجد حاليا

افتراضي مكان.. بغرفتك!



أكثر مايفرحني أن هذا النص:سيرى النور من خلال سماء أبعاد..وتسقبله للحياه صفاء عيونكم ونقاء قلوبكم..


مالي مكان بغرفتك..
ولو صغير؟!
مكان صغير..
حتى ولو ممكن اصير..
مابين فساتينك
ويشربني.. الحرير!
ولاّ انتي خليني على..
تسريحتك
غرشة عطر
قلم كحل
أو..روج..
مابقّاه حي
غير إنه في مرّه..غفى..
فوق شفّتك.
ومن بعدها ..
عفتيه لما شاركك..
كاس العصير!
ولاّ أصير..
تطريز دانتيل ..بشراشف السرير!
أبي مكان بغرفتك..
حتى ولو منسي
ولاتشوفينه
ويملاه الشتا..
عز الهجير:
مجلة أزياء قديمه..مهمله!
سي دي أغاني مالها..
لون ..وطعم
ولا..وضمير!
أو حتى ورده ذابله
الشاهد الباقي على
موعدنا .. يوم جيتي دفا
والليل وحشه..
وزمهرير!
أو لو تبين
خلّيني ياعمري
دريشه
تصبّحين كل يوم عليّ
وفْراشك العاشق ..يغير!
ومرات أقول: ياليتني...
.."روبك" أصير!!!!
وأشاغب غيرة لحافك
ومشطك
والقطا..اللي ربى على الغدير
اللي بقى من غيمتينك.. كل ما..
جادت
على السجاد..باحباب..
وعبير!
وأجنّن اللوحات
والجدران هذي الصامته
اللي إذا لمسها ظلك..
أشرقت
ماتدري وين..من الفرح..
تقدر تطير!
غبّيني تحت وسادتك!
ولاّ بكتاب..
تقرينه قبل النوم
أنا
راضي أكون
لو كلمه ..فـ السطر الاخير!
حبيبتي..
أبي أصير..
أي شي أنا في غرفتك
حتى ولو..
أي شي ..صغير!

 

مسفر الدوسري غير متصل   رد مع اقتباس