واسهر بك
على صوت الحنين
ورفة اهدابي
واذا دق الفجر بابي
أدورني أنا ويني
ألاقيني
وطن غربه
حنين البعد
يلون ريحة اثيابي
وارسم للحلم جنحان
كثير الوان
من ذكرى
كذا فكره
تاخذني لـ سما الـ راحوا
تحملني وترقى بي
واطيح بصحرا مهجوره
حفيف اشجار وعصفوره
واصورني
كأني والأمل خيمه
بأرض الصبر مزروعه
تجيني الريح وتهزني
تكسر باقي أطنابي
وارسم للفرح صوره
قصاصة من ورق أصفر
أعلقها على صدري
يضج صبري
وادفنها مع الذكرى
تضيع بلجة اكتابي
وينك انت .. تعب صوتي
يسافر في مداك أسراب
حمام أبيض ..
يفتح للقا أبواب
واحس الصمت يلعب بي
يشب النار بـ اعصابي
واهز العاصفة حزني
يجيني م المدى صوتك
يبعثرني ..
على الرمضا
وأتلظى
أثاري إن الأمل كذبه
طفل مشلول .. يتسول على بابي
واسهر بك
أفتح كل أبوابي
أصبر نفسي واتحرى
يمر طيفك مع الذكرى
يهز النوم في عيني
ويتمرجح على اهدابي ..