غروب الشمس في مشرق معالم رحلة الغيّاب ..
.. .. .. .. .. .. .. .. نذير الشوم في ليلٍ بهيمٍ غابت نجومه ..
تمادى في دهاليز الضياع وسكة الاصحاب ..
.. .. .. .. .. .. .. ..تقول ان الاماني من صدوف الوقت مهدومه ..
يراودها على حلمٍ تعلق في جناح غراب ..
.. .. .. .. .. .. .. ..متى ما مال بجناحه يطيح ولا بها قومه ..
مواويل الحنين اللي شكت من دورة الاحقاب ..
.. .. .. .. .. .. .. ..تشيل الضيق من جور المكان الشين وهمومه ..
عوى ذيب الضلوع وجاوبنه فـ الضلوع ذياب ..
.. .. .. .. .. .. .. ..عزاها لحية وجيه الردى ماهيب محشومه ..
تغيب رجال لكن يحفظ امجاد الرجال كتاب ..
.. .. .. .. .. .. .. ..على غر الورق ديباجة الامجاد معزومه ..
بعد كنا شريعة حق واصبحنا شريعة غاب ..
.. .. .. .. .. .. .. ..غدينا بين سندان الرقيب ومطرقة لومه ..
تعبنا نمتطي صهوة هوانا والنوايا ركاب ..
.. .. .. .. .. .. .. ..على جرة زرافيل المحال وشامخ رجومه ..
تعبنا نلجم الصادق تعبنا نسمع الكذاب ..
.. .. .. .. .. .. .. ..تعبنا نستر احوال الضمير ابالي هدومه ..
مدام البيت ماله باب وش نبغى بقفل الباب ؟ ..
.. .. .. .. .. .. .. ..حرام نقول في حق الثقة ماهي بمعدومه ..
يدين الشك خاطت من هواجيس المريب ثياب ..
.. .. .. .. .. .. .. ..عليها شرهة العقال تفضح خافي علومه ..
لو ان اكبر طموحاته على ما قال شلفا ذياب ..
.. .. .. .. .. .. .. ..ما شفته يندب الحظ التعيس وسطوة خصومه ..
ربيع الياس يقتل ما بقى من خضرة العناب ..
.. .. .. .. .. .. .. .. إليا هلت هماليل الشقا من كف ديمومه ..
على خد الزمان اللي كسر شوكة كليح الناب ..
.. .. .. .. .. .. .. ..نزع ثوب الظلام ولا لقى تفسير لحلومه ..
يعيش الثار ويدين القضا في المرجفين حراب ..
.. .. .. .. .. .. .. ..ولا ياخذ صليب الراس حقه غير بعزومه ..
جزاء البقمي