حبيبتي
يا عذابات المسافر
وانتظار الفجر...وأنسام الحقول
حبيبتي
يا نظرة الطفل الخجول
لا زاغت أمه عن عيونه داخل الزحمة وضاعت
واختفت خلف التلول
حبيبتي
يا كل همسات الرصيف
وهمهمات الليل...وهموم الشوارع
أنا انتظرتك عمر
والعمر انقضى مني
وأشوف الدرب قدامي يطول
حبيبتي
"غنيت للسنبلة...كل أغنيات الحصاد" **
وانتظرت السنبلة تكبر...ولا جانا الحصاد
فتشت في صمت وذهول
عن زجارة ضايعة
داخل ثيابي قبل ما أقطع الدخان
وأتلذذ بتقطيع الجراد
حبيبتي
متى أشوفك في نسيم الفجر...وعيون السنابل ؟؟
متى أحسك في خفوقي
تغزلين الشمس...بدروب القوافل ؟؟
أتذكر إني
قبل ما أمشي وأروح المدرسة
ألقاك بأطراف الدفاتر تلعبين
وأتذكر إني كنت أشوفك تضحكين
خلف شيفون الستاير
تضحكين
بعد ما أرجع الغرفة
وأفرش فراشي...وأنام
حبيبتي
ضيعت عمري في دهاليز السنين
وضاع العمر...وسط الزحام
حبيبتي
قبل ما أنهي الرسالة
وأترك الغرفة وشيفون الستاير والدفاتر...للأنين
وأطلع الشارع...وأروح
ودي أهمس لك تعالي...تعالي
يا عذابات المسافر
ما بقى فيني مشاعر
تقدر تشيل السنين اللي تعبت منها السنين
حبيبتي
ما بقى مشاعر
تقدر تلملم مسافاتي من دروب الشوارع
وآخذ الغرفة وشيفون الستاير والدفاتر
وين ما أمشي معاي
نذرع الشارع...ونمشي
متشابكين
نكتب أشعار وقصايد
ما كتبها أي شاعر
في يوم من الأيام
** الشطر من قصيدة مشهورة للشاعر نايف صقر[