هات قل لي..!
وين صرنا
كم عام من الدروب؟
وكم عام من الهروب؟
ما توقفنا مدار.
ولا لقينا شي
ممكن يختصرنا.!.!
هات قل لي..!
من رمانا بهالطريق.؟
هي أمانينا الثكالى.؟
والا هي ضيقة فضانا.؟
والا سوء الأختيار.؟
والا هو فقد الرفيق.؟
تكفا قل لي..!!
من حطب ساق الفرح..!
من رمّد ايدين الأمان..!
من حجب وجه الزمان..!
بكف مي وكف نار..
وما انتبه للي انجرح.
هات قل لي..!
ليه لا راحوا الحبايب.
وابتدا العصف الفراق.
صار هذا الأشتياق.
حلم موت وانتظار.!
وكل شي بالعمر غايب..!
اجمع شفاهك سكوت..
ما اظنك الا مثلي.
دربنا رجلك ورجلي.
البس عيونك فنار.
لين تلقانا البيوت..
ولا يهمك وين صرنا..
وكمّ عمر من الدروب .
وكمّ عمر من الهروب.
ولو توقفنا مدار.
ما اظن فيوم نلقى..
اي شيٍ يختصرنا..
غير لحظات الغروب