[عبدالمحسن الطليحي]

[poem=font="Simplified Arabic,5,black,normal,normal" bkcolor="transparent" bkimage="" border="none,4,gray" type=2 line=0 align=center use=ex num="0,black"]
يابعد دنياي كان العمر قبلك كان تيه=لين مالدّيت فيك ولد كل العمر فيّه
العطيّة مو ضرورة شرط يعني اللي تبيه=بس والله ماقنعت إلا لأن أنت العطيّة
والشكر واجب على كل ٍ وعيب نقول ليه=بس من شدة طهرك آحس باقي الكون سيّه
إنقتل فرحي قبل شوفك وأنا أتحرى شبيه=لين ما ربك عطاني ياك للأفراح ديّة
كرّم الله وجه سيدنا وصلى الله عليه=كثر ما أتمنى الشفاعة لك بما إنّك سميّه
جيت ألمّك بالسوالف جيت لك حضن .. إنكفيه=جيت ألقنك الشهادة جيت أدرّسك الوصيّة
الصلاة العهد عاهدني و هالعهد إلتجيه=حج بيت الله وصوم الشهر وزكي لك ضحيّة
إنهج علوم الرجولة والديانة وأبتديه=درب علم ولايوقفك العجز والعنجهيّة
شم عن فعول الرديّة شم عن الشك وذويه=والرديّة لو تطوّر قلهم تبقى رديّة
الهدية أقبل بها والصّبي أحسن إليه=والرشاوي إبتعد عنها ولو سمت هديّة
خلّك أحسن من يقول وإن نطقت أصبح وجَيَه=مدّة الرجال ولسانه أصول المقدريّة
والسكوت أفضل خصوصا ً لو تواجه لك سفيه=وأنطق بحق وتكلم لونه لموتك مطيّة
عف نفسك عن طريق الشك وأحذر لاتجيه=الهوى ضعف الرجال وكم راحت من بنيّه
خلك اللي حاشم ٍ قلبه لشخص ومنتويه=حب لكن تحت شرع الله على سنة نبيه
رافق اللي ينصح الرجال لا أخطا أخيه=ماورا رجال خير ٍ مانصح مرّه خويّه
رافق أبسط ناس أحسن من رفاقة ولد بيه= لو سقوك ألما وهو قدم إليك مهلبيّة
من رغيفك إقسم لعابر سبيلك وأحتوية=وإن عطيته أياه كله يمنحك مولاك زيّه
برْ منهو قد تحرى برك وعشمان فيه=أخفض جناح المذلّة وأخفض جناح الأذيّة
خلك اللي دوّر الجنّة بماطى والديه=ياعسى ربك ينوّر لك على دربك بضيّه
وأحسن النيّة على كل ٍ على كل الوجيه=لين مايصبح لكل إنسان عنوان و هويّة
يا بُني هذي وصاتي لك وهذا اللي أبيه=ما أنا لقمان لكن خضت فالدنيا بيديّه[/poem]

صلوا على النبي

أمانة مايشبهني ؟