العبره اللـي لهـا يوميـن تخنقنـي
خذيت منها على مر الزمـن عبـره
آفرح ليا بان وآحزن لاسـلا عنـي
إلين ماصرت في دور الهوى خبـره
تآمرني آنساك بنسى ويش يمنعني ..!
لكن لياجيت في بالي وش الدبـره ..؟
خذيتنـي سالـي ودالـه ومتهـنـي
ورميتني شـاعرٍ ساهر على حبـره
الله حسيبك على الضيقـه معودنـي
ياكاسر الخاطر اللي شوفتـك جبـره
تطلب وآنفذ وآبي قربـك وتجهلنـي
كني طلبتك تحفـر البيـر بـ الأبـره ..!
تقول :- يامكرم القيفـان تخدعنـي
وآقول :- بعدك كفنه وغيرتـه قبـره
طيفك على صدك وبعدك مصبرنـي
لو كان طيفك يشيل القلب من صبره
آمهلتني للزمـن والوقـت مهملنـي
ياحـر كبـدي على حاجـات منثبره
واللي سرق بالي وحيّـره وآشغلنـي
طاريـك لامـر وش دخلـه بالنبـره
موج الغلا يم سيف الشوق يدفعنـي
ياقـرد حظي معى شفّـي وياغبـره
إليا طلبته يقـول آسـف وفارقنـي
اللي مع َ مايعـل النفـس ياكبـره
ولا انت ياحزبة الضامـي معذبنـي
متى نصادف طريقٍ نلتقي عبره ..؟
آبتصل فيك لاا ..! مانيب متعنـي ..!
آخاف لاقلت ( آلوو ) تخنقني العبره