[نواف التركي]

ـ نرجع نغنّي لـ مي الله يذكرها // بالخير كانت تعرف الحب وش يعني ..

ولا حاجه بس كذا طرى علي البيت هذا , أحس إني بجد أحبه ..

هالمره بسولف لكم عن عرس ما أنساه ..

ـ في عرفنا حاجه أسمها ( العنيه ) طبعاً موجوده عند أكثر الناس بس عشان اللي ما مرت عليه يعرف , ( العنيه ) هي مبلغ من المال تعطيه لأهل المعرس ليلة العرس كـ نوع من التضامن الإجتماعي ومساعدة ذوي القربى ..

مسألة إعطاء العنيه فيها شوية حرج للي مو متعود وفيها ربكه , خصوصاً للمره الأولى .

في عرس واحد من الجماعه طبعاً أهم شي يحضرون الكبار اللي حلاتي هاك الأيام بالطعش ما يشرهون عليهم حضر ولا بقريح , ولأني متعود على سالفة بقريح وما أحضر , مو هامتني السالفه حيل , قعدت العصر ومريت على الديوانيه , لقيت أبوي , سلام عليكم .. هلا .. نفس الكلام بالقصه الأولى .. هلا ..

قعدت كذا أتقهوى وأشوف أبوي يطالعني بنظرات غريبه , دريت إن فيها نكبه , توّني أبي أسحب نفسي وأهج , إلا وهو يا ولدي .. أمر يبه ..

خذ الـ 500 هذي ( رووووووووح 500 شكلي بطلع سوريا ) أيووه يبه
طبعاً بالثانيتين هذي وصلت منفذ الحديثه وتوّني بختّم جوازي ..

إلا أبوي يكمل : وروح لعرس الربع وعطهم ( العنيه )

كيف كيف !

يبه والله أحراج وأنا عمري ما مديت عنيه ..
تكفى هالمره أروح معاك ومره ثانيه أتعلم ..

أنت تفهم ولا لا ..

أفا أيه يبه أفهم ..

أنا ما قاعد أشاورك أنا أقولك روح ..

طيب أبشر

ولا تفشلنا ..
زين ..
أكرب روحك ..
يعني شنو ألعب حديد ..
تامر طال عمرك

وألبس عقالك ..
طيّب

و .. و .. و .. إلخ من وصايا الشيبان

قالك عاد مرسلني لـ غزو القطسنطينيه ... شكلها تنكتب كذا صح ..

الزبده
قلت خلني أستغل شعوره الملئ بالفخر وأطلب منه 5 ريال
يبه ممكن 5 طال عمرك
أبشر..!!

أقعد والله شي ما قالي وش تبي فيها ..

طبعاً الخمسه ناوي أشتري فيها دخان وأفلّها ..

أيه كشخت وأضرب وأطرح خذيت الـ 500 وحطيتها بالجيب اللي فوق والـ 5 حقّت الدخان معاها , وعلى العرس ..

والله وأجي وأتقهوى وبيني وبين نفسي أشجع حالي وأقول يعني شنو السالفه ..
كلها تفضل وأعذرنا عن القصور وحط رجلك ..

شوي إلا أبو المعرس جنبي وأنا أستغل الفرصه وأتقدم السلام عليكم

هلا يا ولدي ..
وين أبوك ؟

هنا أنا قمت أخربط مدري أتعذر عن أبوي أنه مسافر وإلا أقول شفه يتفنجل بالبيت
بصراحه خربطت لين الشايب كذا قام يطالعني مثل اللي يقول : خلاص يبه عطنا عنيتك وأذلف ..

مدري كيف طلعت العنيه عطيته
وعلى باب الصاله .. أهرب

يالله والله هم كانت

على أول بقاله يا شيخ خلني أشتري دخان داخ راسي قالك ود عنيه ومدري وشو

: صديق عطنا واحد مالبورو ..
جاب الدخان طلعت الفلوس ..
إلا اللي بجيبي الـ 500
ألعن أم السالفه

أثريني مع الربكه طلعت الـ 5 وعطيتها الرجال

يا فضيحتنا
وأنا أطلع من البقاله ركض
أركب السياره وعلى الصاله

وألقى أبو المعرس

معليش يابو
أنا صار معي كذا كذا
وأسف ..
وهذي عنيتكم طال عمرك ومن هالكلام

ضحك وقال عادي ياولدي تصير وأنا هقيتك مخطي وخذا الـ 500

طبعاً مشى ما عطاني الـ 5 حقّت الدخان

يعني عنيتهم صارت 505

وأنا أطلع أجرجر أذيال الهزيمه مفلس لا من دخان ولا من سالفه بيضحكون عليها الشيبان شهر قدام ..

كانت تجربه فاشله بصدق

بكره في عرس لواحد من الجماعه
وهالسالفه كل طاري عرس تطري علي ..

وسلالالالالالالالامتكم