-2-
((... حاجر العطبول ...))
للبدر بن عبدالمحسن
خدود الرمل بشّت بالحيا من حبة الهملول
وانا تحت المطر ما بل غير دموعي ردوني
ومر العشب ف اقدام السحاب المقفيات حجول
رحل فصل الربيع وما درت به زهرة جنوني !
سألتك لين ما جف النصي وانشق للغرمول
شفاة من هجير الصيف والعربان ملوني
سألتك لين ما شاب الكحل في حاجر العطبول
وطلق هالحنين ابله همل في غفلة عيوني
سألتك لحظة بيضا حبيب وحاجب مفلول
وصدق يعتق بهام الندم من عضة سنوني
أنا المنثور فوق البيد تجمعني تعب ونحول
وتسأل عرقي اليابس متى عافتني غصوني
تكلّم طال صبري بانتظار المر والمعسول
تكلم لين يخدعني يقيني تصدق ظنوني
حبيب شالوا عيوني هلي والراحلين حمول
وقفوا ما بقى لي غير قلبي داخل جفوني
ألا يالله كان اللي مضى لي يشبه المجهول
تيسّر لي عدو ما عليه أشباه مضنوني !
غدا يشبهني في الساعة عبث هالعقرب المشغول
اعد اللي رحــل بي وان وقفـت بيرحل بدونــي