[عبدالرحمن الغبين]

وهذَا أَوّل أَعْيَادِي،
يِمِرّ بْدُونْ مَا شُوفَكْ،
وَلا أسْمَعْ لَكْ،
أَوْ أَقْرَا،
مِنْ حرُوفَكْ :
" يـعُود بْخَيرْ " !



غَرِيْبَة رِحْت !
مَعْ إِنِّيْ فـْ عِيْدِيْ المَاضِيْ،
بِصِدْقِي بِحْت :
"يِعُوْد بْعَافِيَة وَافْرَاح،
عَسَى يَا صَاحْ،
يـعُود بْخَيرْ"



وَلَكِنْ، .. رِحْت !
وَلَكِنْ، رِحْت واكْتَضّ الفضَا بالغَيمْ،
وِهَلّ الدِّيمْ :

ومرّن ليلتين، أهيم. أردد بس : "أفا يافلان ..
تماسك واستعن بالصبر وحنا بالاخير اموات "

ومرّن ليلتين، وما زَهَا في طلعتك ديوان،
ولا أنورت بحضورك ظلامٍ لف هالطرقات.

ومرّن ليلتين، الكل ينشدني وانا مشتان،
أفكر، حايرٍ، مهموم، وطرفي ساهرٍ مابات.

أهوجس وسط ذا المجلس، غريق الفِقْد والأحزان،
أَلِدّ الشّوف لِـ "دْلاَلَكْ"، وأعلّي في حشاي أصوات:

هنا ياما تسامرنا ولوّنا فضانا الوان،
هنا ياما تذكرنا صبانا وأجمل الاوقات،

هنا كم قلت لي طرفه وكم عبّرت بالاوزان،
وكم مره ضحكنا وكم نثرنا بالحزن دمعات.

تذكّر في عزا جدّك وانا الومك : "أفا يافلان ..
تماسك واستعن بالصبر وحنا بالاخير اموات"

وجاني يوم افقد به أعز وأقرب الخلان
وجاني يوم قالولي : "تِصَبّر كِل حَيٍّ مَاتْ"

انا منهو يصبّرني ويلهمني بك السلوان؟
بفقدك من يلملمني لك الله صايرٍ اشتات؟

فقدت الاوفى، الاطهر، فقدت اغلى من الاخوان،
فقدت يميني وشوري اخذهم هادم اللذات.

تهدم ثالث صروحي وزلزل ثابت الاركان،
وطاحت للثرى رايه تساوي بهالزمن رايات.


وهذَا أَوّل أَعْيَادِي،
أَحَاكِيْ مِنّك طيُوْفَكْ،
وَلا تَسْمَعْ لَيْ،
أَوْ تَقْرَا،
مِنْ حرُوفَيْ :
" يـعُود بْخَيرْ " !