[نوف الناصر]

‏( الملهمة )

‏أذكر اني.. كنت اطيّرلك من أشواقي حمام
‏يحمل اغصان السّلام..
‏وانت ماتدري بأني كِنت أزْهِر..
‏داخل شْعوري : أحبك ..
‏واكْتِمْ احساسي إذا بْصدري تِبَعْثَرْ..
‏وكنت اغنّيلك فِكِلْ ليلة : ( دِلِلّو يالْوَلَدْ يا ابْني دِلِلّو )…لين تِتثاوب على صوتي .. وْتَنام!
‏وانت تَسْهِرني ..
‏وتكْسرني ..وتِقْسى !!
‏يعني ماتدري ..بأنّي مُرْهَفَة.. وكسري حرام
‏🕊🕊🕊🕊🕊

‏يعني ماتدري بأنيّ كِنت أبكي.. واحضن احزاني وافضفِض للوسادة..
‏ عن قساوة قلبك اللي مارحمني.
‏وكنت أرفض..
‏إنّك تْقَيِّد حُضوري في قصيدة.. لاجل تَكتبْ ..
‏لاجل تَعبث بالمشاعر..
‏وتَحْصِد التّصفيق وانا ( الْمُلْهِمة )..اللّي يِنْكِسِرْ لي ألف خاطر..
‏ يمكن يقولون شاعر )..!
‏ وكنت وحدي أنزوي في هامش شْْعورك.. سراب..
‏وكنت أمْطِرْ ..
‏لكن احساسك جفاف ..
‏كنت احاول أشعل احساسي شموع..
‏وكنت أحاول
‏وانت تطفيني ظلام!
‏🕊🕊🕊🕊🕊

‏ أذكر إني ..
‏يوم وارَبْت الحُضور..
‏جيتني تِتْناثَر بْصدري شُعور..
‏كنت "غَضَّة" بْقلب أبيض..
‏كنت طفلة تبتسم لك .. وانت تعطيها اهتمامك تَحْسِبَهْ لعبة
‏تخاف انْها تضيع..
‏كنت في صدري رِبيع .. وكنت أتْوَسَّدْ غَمامك..
‏مثل ريح
‏كنتِ لي اشْيا جميلة
‏قبل لاتصبح خريف
‏وتَصْفَر اوراقي وْتِطيح ..
‏وتَكْسِر اغْصاني..وْتِمَوِّتْ كِلْ عصافيري..
‏وكنت اناديلك.. أناديلك.. أنادي
‏لين بحّ الصوت
‏في فمّ الكلام..!




https://twitter.com/too_simple_girl/...492254721?s=46