اسمع كلام الحق بالله ياحسين
ماينشد الحاجه سوى من فقدها
ظلم القرابه مثل جور السلاطين
وقعه على قلبي كما المر وادها
وافي مع الادنين وايضا البعيدين
النفس تبذل والحصيله سعدها
احرص على ود الرجال الموالين
والطيّبه ياطيب رجل ٍ حصدها
ما اسمع كلام المفسدين الشياطين
بعض السوالف ياعرب ما اعتمدها
واللي يشب الحرب بين القريبين
عساه في نار ٍ تزايد وقدها
ياليتهم ياحسين للشرع ماشين
تنحل عقده من رفيق ٍ عقدها
عندي ادله ثابته بالبراهين
أقدّم الحجه وعندي سندها
ما دام قدامي رجال ٍ ميامين
وقاضي بيفهم حجتي ما نقدها
والحكم يرضي عارفين القوانين
من يفلج الثاني حقوقه وجدها
أدل دربي واعرف الزين والشين
والناس مثلي ما تخلي جهدها
مبدايّ ثابت من قديم ٍ وهالحين
اسلك دروب ٍ فاز من هو قصدها
الطيب يبقى منهج ٍ سنّه الدين
وحسن التعامل بالشريعه عمدها
نرحل من الدنيا ما حنا مقيمين
والفايز اللي جنته قد وردها
محمد_الثوعي