لكم لقلوبكم
ولطفل كنت أشبهه يومًا ما
لكن الليل هذا... اصدقه أكذبه
ان جهلني يقينه صحت بالشك فيه
اعرفه قبل احرث الذاكرة واكتبه
قبل افلّ الجروح بسرمديّه واتيه
من طويله عرفت ان القصايد هبه
من قصيره عرفت الفرْح ماله شبيه
في سكونه حنين يرد لي اعذبه
صوت لـ أمي ويلبسني نعاس ارتجيه
في تهاويدها كان الزمان اصعبه
مايكفكف دموعي في دفا راحتيه
كنت طفلٍ قناديل السما موكبه
كـل مـالاح نجـم ٍ قلـت يُمه أبيه
يضحك العمر وسنين الصبا معشبه
واضحك احيان والذكرى عذاب النبيه
آتتبع شريـط الـذاكـرة و انتبـه
ماعرفني وانا اللي انتهي وابتديه
كم تهدج على درب الكلام أنسبه
صوتي اللي ذخرته للسؤال الوجيه
كان بيني وبين الطفل هذا شبه
ما غدا من تشابهنا تعبت احتريه
شيطنته وهدوءه فضته وذهبه
حلم غضٍ تلالا في دجى مقلتيه
اذكره مثل طيفٍ ماقطفت عنبه
واتبعه مثل دربٍ مارجيت اهتديه
المرايا تحاشى سيرة الأجوبة
في تفاصيل وجهٍ حيرته تحتويه
ليه تطفِي مفازة عمري المجدبة
روح طفلٍ تهادت في صبا العمر تيِه
آه .. ياوجهه اللي ماقدرت اجذبه
من غيابات جب الذاكرة وأرتديه