أتمنى ان تنال رضاكم
تموت اصواتنا والصمت يشريني
ويبقى صوت يشبه صوتي أينادي !
أدوّر حلم يشبه طيش عشريني
ألاقي واقعي أكبر من أعنادي !
رفضت أنفي طموحاتي وأعرّيني
تعبت أبقى مثل هذا المدى غادي !
أبي شيٍ على هذا يجرّيني
وأنا حرّيتي موتي وميلادي !
أخاف أن متّ مابه حيّ يطريني
وأخاف أبقى مثل بعض البشر عادي !
رفيق الدرب والمشوار يغريني
وأنا بين المسا وقلوب حسادي !
أقول لكل لحظة حب مرّيني
وأدوّرلي وطن يستوعب أعيادي !
أمانه يالعطش وش ذنب نسريني
أبي أعرف من المخطي من البادي ؟!
وحيد وكل غصنٍ مايذرّيني
غريب أبقى وأنا مستوطن بلادي !
تعبت ومابقى صبرٍ يجاريني
أبي أصرخ بسم جرحي وميعادي !
أبتمرّد وأدوّر من يداريني
وأقول أن الأمل أكبر من أمجادي !
وأقول لغربتي لاضعت زوريني
مدامي في عيون الناس متمادي !
فلاح العماش