اخلف الليل ميعاد الغروب؟
أو نوى الصبح بدري يبتدي؟
أو هي الشمس لا غابت ينوب؟
عن سناها.. حضورك سيدي
انت ياللي لبست الحِسْن / ثوب
جيت.. والروح رَدّت لجسدي
تسلك خْطاك مِجْدبة الدروب
وايّحَيا.. كل قاعٍ جرهدي
خفت قلبي من الفِتنه يذوب
ودي اثقل.. ولا هو في يدي
اثقل شلون..والنِعّاس عُوب؟
قبل لاتنطق بْحرف اغدي!
ضايعٍ بك وقلبي.. مايتوب
عن محبّتك يالغصن الندي
وان غدى الحب ذنب من الذنوب
يقضي العمر.. من قبل اهتدي
اعشقك بالمزايا والعيوب
كثر مابك جمالٍ سرمدي
كثر ما الغيض ياكل في قلوب..
الرديين.. لا طاب أجودي
انت لو هي مثل حَبْل الكذوب
غيبتك.. نام بالعين سْهدي
وإن تبسمت يا السَّمح اللعوب
قلت.. وفّيت للجمر وَعدي
ما اخْلف الليل..ميعاد الغروب
إستحى، يوم شافك يبتدي
من يلومه مادام إنه ينوب
عن سنا الشمس..وجهك سيّدي!